अडीच अक्षरे प्रेमाची

मनात जळते उरात पोळते

विरह व्यथा मला छळते,

भाषा डोळ्यातील भावफुलांची

तुला कशी ना कळते ||

भंगलेल्या मुक्या मनाच्या

वेदना मी साहिल्या ,

कठोर तुझ्या हृदयाच्या

भावना ना हेलावल्या ||

अजुनी जाळते जीवास माझ्या

विरहाच्या या झळा ,

करपून गेला आयुष्याचा 

तुझ्या प्रेमावाचूनी मळा ||

वाट पाहुनी शिणली ग या

डोळ्यांची पापणी ,

येशील कुठल्या क्षणी म्हणोनी 

जागतो रात्रंदिनी ||

आशेवरती अजून जगतो 

करू नकोस निराशा ,

तुझ्या रुपाने फिरून हसावी

अंगणात या उषा ||

तोड आता सारी बंधने

वाढली उरात या स्पंदने ,

कसं सांगू तुला साजणे

झाले मुश्कील माझे जीणे ||

अडीच अक्षरे प्रेमाची 

करती किमया स्नेहाची ,

जाण ठेव डोळ्यातील भावफुलांची

परतूनी ये शपथ तुला प्रेमाची ||