सकाळी सकाळी

यमुनेच्या तळी सकाळी सकाळी

बासरी कोणी आळविली

मधुर भूपाळी मंजुळ गाणी

साखर झोप कुणी चाळविली||

मंजुळ मधुर नाद पडता कानी

पापणी माझी अलवार उमलली

गंधीत धुंदीत परीमळाने कोणी

प्रसन्न पहाट सारी दरवळली ||

सप्त सुरांनी केली ही किमया

घातली मजला मोहिनी माया

थंड लहरीने वाऱ्याच्या

अवघी मोहरली माझी काया ||

  

कळलेच ना पायी पैंजणे

आपसात का चुळबुळली,

मोरपिसापरी प्रेमभावना

सर्वांगातूनी सळसळली.||