परतून ये रे भीमा

दलित इथे अजुनी उपेक्षित

व्यथा कथावी कुणा

भीमा परतुनी या हो पुन्हा

बाबा परतुनी या हो पुन्हा

सुज्ञ जनांना इथे कळेना

माणुसकीचा अर्थ

समानतेची भाषा ठरते

जेथे तेथे व्यर्थ

स्वार्थापोटी जो तो देतो

आम्हास खोटी ग्वाही

पाषाणास परंतु जगी या

पाझर फुटला नाही

गटबाजी तटबाजीने 

झालो इथे हैराण

नयनी गोठले अश्रू आणि

कंठात रुतला प्राण

कुठवर सोसावी मुक्याने

मानभंग वंचना

मिटता मिटेना वर्णद्वेषाची

कुठेच द्वैतभावना

कुणी ना वाली तुम्हावीण

या दीनदुबळ्या जना

हात जोडोनी तुला विनवते

परतुनी ये रे भीमा