अभंग
अभंग
अती राग माथी । काय तो कामाचा ।
गढूळली वाचा । अपशब्दें ।।१।।
मिथ्या अहंकार । मनी भरलासी ।
जनां दुखविसी । वेळोवेळी ।।२।।
चिंतेत बुडसी । सदासर्वकाळ ।
धैर्य देई बळ । तरावया ।।३।।
विंचू संशयाचा । जर का डसला ।
सर्वनाश झाला । संसाराचा ।।४।।
शरीरसुखाचा । नको रे हव्यास ।
धरावी ती कास । विवेकाची ।।५।।
कदापि न द्यावे । लोभा स्थान मनी ।
व्हावे समाधानी । थोडक्यात ।।६।।
मत्सर वाळवी । नात्याशी पोखरी ।
अंत तिचा करी । सौहार्दाने ।।७।।
नको राहू कधी । निराशेत दुःखी ।
जगी सर्वसुखी । कोण आहे ।।८।।
सोडी वैरभाव । जपे मानवता ।
तोचि भगवंता । प्रिय भारी ।।९।।