अभिजात मातृभाषा

एक आई जन्मदात्री 

एक माउली मराठी 

भाषा सहज सुंदर 

जसे हरिनाम ओठी ||१||

माझी माय साजतसे 

लेउनीया अंगावरती

अनुप्रास अलंकार 

वाक्यप्रचारांचे मोती ||२||

नाम सर्वनाम आणि 

म्हणी समर्पक अति

वाक्य-विचार, समास 

तिची शोभा वाढवती ||३||

भारतात लक्ष भाषा 

तोड नाही मराठीते

आजी संस्कृत मानाने  

ओटी आईची भरते ||४||

ज्ञानेश्वर रामदास 

थोर कवने रचिति 

 तुकाराम अभंगात 

मराठीचे गुण गाती ||५||

अभिजात भाषा माझी 

असे मला अभिमान 

देते वचन सर्वथा 

वाढवीन तुझा मान ||६||