कृपासिंधु

वर्धा जिल्ह्यामध्ये | गरीब घरात |

प्रकटली ज्योत | करुणेची ||१||

पित्यास वाटली | नकोशी मुलगी|

नाव तिजलागी | चिंधी देती ||२||

सिंधूला लागला | शिक्षणाचा ध्यास |

करती अभ्यास | चोरुनिया ||३||  

बालविवाहाचे | ओझे दिले शिरी |

फाटी गोळा करी | सिंधू ताई ||४||

पेटून उठली | जणू दुर्गामाता |

संदेह दाविता | चारित्र्यासी ||५||

राही स्मशानात | सांभाळले स्वत्व |

टिकण्या अस्तित्व | झगडली ||६||

अनाथ मुलांना | आसरा दिधला |

संकल्प घेतला | पालनाचा ||७||

अनाथांची आई | जाहलिसे थोर |

दिला परिवार | शिक्षणही ||८||

बाल सदनाची | स्थापना करती |

झाल्या मुलांप्रती | प्रिय माई||९||

प्राप्त पुरस्कार | अपार जाहले |

नाही सोडियलें | साधेपण ||१०||

 करते संपदा | पायी प्रणिपात |

माते तू साक्षात | *कृपासिंधू* ||११||