मृदगंध पावसाचा
मृदगंध पावसाचा
पाऊस पहिला | निसर्गाची माया |
आला घेऊनिया | मृदगंध ||१||
कस्तुरी सुवास | सर्वत्र पसरे|
हरली अत्तरे | याच्यापुढे ||२||
धरती फुलांनी | सजली नटली |
हिरवळ ल्याली | स्वागताला ||३||
गरजती घन | सवे विद्युल्लता |
येईल सुबत्ता | सांगतसे ||४||
सुखावले पक्षी | पावसात न्हाती |
राग तो छेडती | मल्हाराचा ||५||
मोर आनंदाने | पिसारा फुलवी |
नभाला खुलवी | इंद्रधनू ||६||
पाऊस पहिला | वाळिवाचा आला |
चित्ती सुखावला | बळीराजा ||७||
पाऊस संपवी | चातक प्रतीक्षा |
सुखी दही दिशा | जाहल्या त्या ||८||
सांगते संपदा | मुग्ध करी मन |
येता तो दुरून | मृदगंध ||९||