आया मंडईका दिन

भयी खतम दिवारी

आया मंडईका दिन |

आता देखन दंड्यार

आमी गावंला जाबीन ||१||

रास किसन गोपीकी

होसे दंड्यार रुपमा |

टाऱ्या खेलसेती मंग

आखरको चवूकमा ||२||

गाव आवसेत संगी 

मंडईको बहानालं |

मिलकर सबकोच 

भेट जासे हालचालं ||३||

मोरो गावं मंडईला

देखनला होसे गर्दी |

आसपास गावकाबी

भेटसेती हमदर्दी ||४||

मंडईमा भरसेती

रंग रंगका दुकान |

लेनसाती फिरंसेती

मोठो संगमा नहान ||५||

मंडईमा दिनभर

रव्हं खुब रेलचेल |

मंग मनोरंजनला

राती डरामाको खेल ||६||

आय रहीसे चलत

जुनो जमानोकी रीत |

येनं मंडई मेलालं

मन होसे आनंदीत ||७||

आवो बड़ेगांव मोरो

असी मंडई देखन |

शुक्ल कार्तिक तीजला

होसे येको आयोजन ||८||