आत्मविश्वास

मी तमाने कोंडलेला श्वास नाही 

सूर्य आहे मी कुणाचा दास नाही 

टोळगोटे फोडले मी काळजाने 

घेतला लावून कधी फास नाही 

आरशावर प्रेम आहे खूप माझे 

तोडला त्याचा कधी विश्वास नाही 

खेळतांना हारलो मी लाख वेळा

जिंकण्याची सोडली मी आस नाही 

वादळांची अन तुफानांची कथा मी

गोष्ट माझी प्रेमळ उपन्यास नाही 

मी उन्हाचा पेटलेला जाळ आहे 

श्रावणाच्या पावसाचा मास नाही 

संकटांशी मी लढाया सज्ज झालो

मलमपट्टी बांधली घावास नाही 

आसवांच्या सागरांचा नाखवा मी

मी सुखाच्या कल्पनांचा भास नाही 

जीवनाशी युद्ध माझे रंगलेले

वेदनांना टाकला मी घास नाही