आजची स्त्री

बंधन पारतंत्र्याच्या तोडून बेड्या

बंधनातून मी आज मुक्त झाले

मोकळ्या आभाळी घेईन भरारी

स्रीजन्माचे माझ्या सार्थक झाले । । 

युगानुयुगे जखडलेली

मी एक नारीशक्ती

सहनशक्तीची जोखंडे

प्रेम त्यागाची अंगी भक्ती । । 

बंदिस्त झालो आज जरी

सूर्य उद्याचा पाहीन पुन्हा

अजानताच घडतो ना

कधीतरी हातून गुन्हा ।।

आज तोडूनी शृंखला

बंधमुक्त मी जाहले

घेई गरुड भरारी

स्त्रीत्व तेजाने नाहले । । 

सर्व बंध तूच झुगारून

नारी तोड आता ती शृंखला

मुक्त होशील तू ग जीवनी

 राहशील ना उद्या अबला । । 

हो मुक्त तुझ्या जीवनी

घे आभाळ कवेत भरून,

तोडून टाक पाश सारे

खुणावती दिशा या दुरून.। । 

नारी घे तू उंच भरारी 

शृंखला तोडून स्वबळावर 

आत्मविश्वास चिकाटीने 

मात कर येणाऱ्या संकटावर.। । 

बंधनात अडकून

होती बिचारी

तोडून बंधन

झाले मी विचारी । । 

बंध बेडीचे तोडूया

होता उषःकाल आज

नव क्रांतीची मशाल

डोईवर शोभे ताज.। ।  

खोला माझ्या हातातील बेडी

होऊ द्या आज मजला मुक्त

बनवू द्या माझे स्वतंत्र अस्तित्व

होऊ द्या स्वयंसिद्धा नारी सशक्त । । 

तोड सारे बंध आता

स्वयंसिद्धा ती सबला

कर्तृत्वाचा वाजे डंका

नसे आता ती अबला । । 

अवनीवर जन्म घेता बाईचा

अडकले मी अनेक बंधनात

स्वैर होऊन मनसोक्त उडावे

सूर्यासम झळकावे गगनात । ।