പൂജവെപ്പ്

ഇന്നും ഞാൻ ഓർക്കുന്നു ആ ദുർഗാഷ്ടമി നാൾ, 

വിശേഷങ്ങൾ ചൊല്ലി ഞാൻ മുത്തച്ഛനോട്‌ 

പുസ്‌തക പൂജവെപ്പിന്റെ;

വാർദ്ധക്യം പ്രതിഫലിക്കുന്ന പല്ലില്ലാത്ത -

മോണകൊണ്ട് മുത്തച്ഛനും 

മധുരം കാർന്നുതിന്ന പൊടിപ്പല്ലുകൊണ്ട് ഞാനും

ഊറി ഊറി ചിരിച്ചു; പല ഫലിത സ്‌മൃതിയിൽ.

വിജയദശമി വന്നു,

വെളുക്കും മുൻപെ ഉണർത്തിയ അമ്മയോട് 

ദേഷ്യം തോന്നിയോ ? ഓർമ്മയില്ല.

എന്നാൽ, പിന്നീട് ഞാൻ കണ്ടു; എൻ അച്ഛൻ,

ആദ്യമായി മിഴിനീർ തൂകുന്നു.

ഞാൻ ഓടി, മുത്തച്ഛൻ തൻ മുറിയിലേയ്ക് 

അവിടെയതാ... എൻ അമ്മ നൽകിയ 

ഇളം ചൂടുവെള്ളത്തിൻ ബാക്കി...

ഇപ്പോഴും ചൂടോടെയോ ?