കവിത:കടലാഴങ്ങൾ. രചന :ബിനു R
കവിത:കടലാഴങ്ങൾ. രചന :ബിനു R
കവിത തൻ സാഗരത്തിൻ
കരയിൽ നിന്നു ഞാൻ നിർന്നിമേഷനായി
നോക്കി നിന്നീടവെ,
അരികിന്നടിയിൽ തെളിഞ്ഞിരിക്കുന്നൂ
വെളുത്തമണൽത്തരികളാകും
ഒറ്റവരിക്കവിതാ ശകലങ്ങളും
ചെറുമീനുകളും ശംഖുകളും!
മുട്ടോളമെത്തും കടലിലേക്കിറങ്ങിച്ചെല്ലും
വേളയിലറിയാം തിരകൾ തിരിച്ചു
പിൻവാങ്ങീടുമ്പോൾ,കാലിന്നടിയിൽ
നിന്നിറങ്ങിപ്പോകും മണൽമേലാപ്പുകൾ,
ചെറുതരിപ്പോടെ!
വെൺകൊറ്റക്കുടചൂടും അഴകിനേയു -
മമ്പരപ്പിക്കും പവിഴപ്പുറ്റുകളുണ്ടെന്നു
ചൊല്ലുന്നൂ മുങ്ങാംകുഴിയിട്ടുവന്നുകയറും
മഹാമേരുക്കളാം കവികുലോത്തമന്മാർ.... !
ഞാനുമൊന്നൊരുങ്ങുന്നൂ സാഗരത്തിൻ
മടിത്തട്ടിൽ മനോഹരങ്ങളാം
പവിഴപ്പുറ്റിന്നിടയിൽ നിന്നും, ചന്തമിയലും
ഒരു പവിഴം തന്നെ നേടുവാൻ... !