ದುಡಿ

ರಾತ್ರಿ ಗಾಢಮೌನದೊಳಗೆ

ನೀಲ ಕಾಡಹಾಡಿಯೊಳಗೆ ||

ಕಾನುಜೀವ ಮಿಡಿಯುತ್ತಿತ್ತು

ಬಿದಿರಕೋಲು ದುಡಿಯೊಳಗೆ ||

ಇದ್ದ ಒಂದು ಸಣ್ಣಬೆಳಕು

ಸಾಯೋ ಮುಂಚೆ ಹೇಳಬೇಕು ||

ಕಾನುಜೀವ ಉಳಿಸಬೇಕು

ಹಾಡಿ ದುಡಿಗೆ ಅನ್ನಬೇಕು ||

ದುಡಿಯ ಹಿಡಿದ ಕಪ್ಪು ಕೈ

ಮಾತೇ ಬರದ ಮೂಕದನಿ ||

ಹೇಳಲೊರಟ ಧಾಟಿ ಮಾತ್ರ

ದುಡಿಯಚರ್ಮ-ಬಿದಿಎ ಕೋಲು ||

ನೆರಕೆಗೋಡೆ ದಾಟಿ ಬಂದು

ಕಾನುದಾಟಿ ಬರಲು ಯತ್ನ||

ದುಡಿದು ಬಂದ ದೇಹಕ್ಕೊಂದು

ನೆಮ್ಮದಿಯ ಹುಡುಕಲೆತ್ನ ||

ಮುತ್ತನೆದೆಯರಾಗ ಮಿಡಿತ

ದುಡಿಯ ಬಡಿತ ಸಿಡಿತವು ||

ಅಡಗಿ ಹೋದ ಅಡವಿದನಿಯ

ಕಪ್ಪುಕತ್ತಲೆಯಾ ಸೆಡವು ||

ದುಡಿಯ ಶಬ್ದ ರಣರಣ

ಅನುದಿನವೂ ಅನುರಣನ||

ಸವೆದ ಚರ್ಮಕರ್ಮದಲ್ಲಿ

ಶಬ್ದ ಧ್ವನಿಯ ಹೂರಣ||

ದುಡಿವ ಕೈಗೆ ದುಡಿಯು ಸಿಕ್ಕಿ

ಹೇಳಲೊರಟ ಮುತ್ತನು||

ದುಡಿಯೇ ಕೂಗಿ ಹೇಳುತ್ತಿತ್ತು

ಗುಡಿಯ ನೆಪದಿ ಬರದಿರಿ||

ನೆರಕೆ ಮೀರಿ ಕಾನುದಾಟಿ

ಹೇಳಲೊರಟ ನೋವಲಯವು||

ಒಡಲ ಬೇಗೆ ಧ್ವನಿಯ ಮೀಟಿ

ಹೊರಟ ದುಡಿಯ ಶಬ್ದವು||

ದುಡಿಯೇ ಕೂಗಿ ಹೇಳುತ್ತಿತ್ತು

ಗುಡಿಯ ನೆಪದಿ ಬರದಿರಿ||