વાત કર
વાત કર
આજ લાગણીનાં ભવ્ય વરસાદમાં તું ભીંજાવાની વાત કર,
આડંબરની આ છત્રી ને રેનકોટ ઉતારવાની વાત કર !
ધરાથી ઊઠી અલગ બૂંદ થઈ બંધાયા વ્હાલપના વાદળમાં,
હવે એક થઈ અસ્મિતા ગુમાવીને વરસવાની વાત કર !
રૂદિયાના આકાશે ધડકનોમાં ગડગડાટ ગાજી રહ્યો જે,
આંખમાં આંખ મેળવીને વીજળી ચમકાવવાની વાત કર !
એકમેકમાં ઓગળી ધારા બની વહીએ સાથે પ્રવાહ થઈ,
હવે મર્યાદાના કિનારે સરિતા થઈ ઉછળવાની વાત કર !
નવા તીર્થ, નવા ઘાટ રચતા રચતા વહીએ સદા આગળ,
ભૂલી ભાન, આન બાન ને શાનથી સાગરમાં સમાવાની વાત કર !
"પરમ" મંઝિલ તરફ, પરમ રાહનાં હમસફર આપણે,
છોડ શાણપણ સંસારી સઘળું ને "પાગલ" થવાની વાત કર !