સરદારનું ગીત-૬૮.

યુદ્ઘના ટકોરા (ઈ.સ. ૧૯૪૧-’૪ર)

ગાંધીએ સૂચના આપી, જેઓ છૂટી ગયેલ રે;

સત્યાગ્રહ ફરી તેને, કરવાનું કહેલ રે.

ચોથી ડિસેમ્બરે છોડયા, જેઓ રહેલ જેલ રે;

ભવિષ્ય કરવા નક્કી, બેઠકનું કહેલ રે.

થઈ બેઠક તેઓની, ચાલી દિવસ સાત રે;

એક માસ રહે ગાંધી, એ ટાણે ગુજરાત રે.

બેઠક બારડોલીમાં, પ્રાંતિકની થયેલ રે;

સરદારે જઈ તેમાં, ભવિષ્ય સૂચવેલ રે.

આવશે કપરો કાળ, એવી વાતો કરેલ રે;

નિર્ણયો આપણા જાતે, કરવાનું કહેલ રે.

જાપાની હુમલા ખૂબ, થવા લાગી ગયેલ રે;

કરે રક્ષાણ અંગ્રેજો, એ આશા ન રહેલ રે.

રક્ષાણ કરવું જાતે, ભારતનો સવાલ રે;

ભારત ચેતશે નૈ તો, બગડી જાય હાલ રે.

કહે બેઠક બોલાવી, સહુને સરદાર રે;

હવે શું કરવાનું છે, એ કરવો વિચાર રે.

નીડરતા અને શાંતિ, બધે ફેલાય જાય રે;

ફેલાતી અફવા ખોટી, અટકાવી રખાય રે.

વેર-ઝેર અને ભેદો, સૌએ ભૂલી જવાય રે;

મોં સરકારની સામે, ફાડીને ન રખાય રે.

ચાલુ એવી લડાઈ છે, જગ થાય ખલાસ રે;

યુદ્ઘ અટકશે કયારે, એની આવે ન વાસ રે.

નકામું ન બગાડાય, એક દાણો અનાજ રે;

માણસ ન રહે ભૂખ્યો, શોધો પૂરો સમાજ રે.

ગોળી સામે ન જાઓ તો, કાયર ન થવાય રે;

સામનો કરવા માટે, બધું શીખી રખાય રે.

દસેક દિન તેઓએ, લોકો વચ્ચે ફરેલ રે;

શૂરાતન અને પાનો, માણસોમાં ભરેલ રે.

**

આંતેડાંની બિમારીનું, ઠેકાણું પડતું નથી;

તોયે થતું રહે કામ, દેશનું સરદારથી.

(ક્રમશ)