સરદારનું ગીત-૪૦.
સરદારનું ગીત-૪૦.
સેવાકાર્ય (ઈ.સ. ૧૯ર૯)
દારૂ નિષેધના કામે, પ્રમુખ સરદાર રે;
મીઠુબહેન મંત્રીનો, સાથ હતો અપાર રે.
રાનીપરજ લોકોને, શિખામણ અપાય રે;
દારૂવાળા કરે વાર, એની સામે થવાય રે.
જાત બચાવ માટેનો, કરવો પ્રતિકાર રે;
આપતા શીખ લોકોને, વિચારી સરદાર રે.
મોરબી પાંચમી એક, પરિષદ ભરાય રે;
એના પ્રમુખ હોદ્દાએ, સરદાર નિમાય રે.
ગાંધીભકત તરીકેની, થયેલ ઓળખાણ રે;
લોકોને આપવા ભાન, ઘણાં છોડેલ બાણ રે.
વાંદરામાં વળી એક, પરિષદ ભરાય રે;
ત્યાં મહેસૂલનો પ્રશ્ન, વિસ્તારથી રખાય રે.
સરદાર સદા ઈચ્છે, સંભાળું ગુજરાત રે;
પણ હતી ન લોકોને, આવી મંજૂર વાત રે.
દે આમંત્રણ રાજાજી, જવા તમિલનાડ રે;
દૂષણોથી ભરાયેલી, કરવા દૂર ખાડ રે.
ત્યાં સરદારની વાણી, કરી અસર જાય રે;
એવી અસર જાગી કે, વિવાદો દૂર થાય રે.
પરત આવતા રાખ્યો, કર્ણાટક મુકામ રે;
ત્યાં ધારવાડથી માંડી, ગયેલ બેલગામ રે.
સભામાં આપતા તેઓ, ખેડૂતોને સલાહ રે;
ખેડૂત સંઘ રાખીને, ચાલવું એક રાહ રે.
સરદાર પછી રહ્યા, પંદર દી’ બિહાર રે;
લાવ્યા ઘણી બદીમાંથી, બિહારીને બહાર રે.
લડત કાજ લોકોને, ભણાવે સરદાર રે;
સેનાપતિ બની તેઓ, ઝનૂન આપનાર રે.
અધિવેશન લાહોરે, રહેલ જોરદાર રે;
પૂર્ણસ્વરાજ માટેનો, ઠરાવ થ્યો પસાર રે.
**
અમદાવાદનું છોડયું, સરદારે મકાનને;
રહ્યા તેઓ બનાવીને, ઘર દેશ મહાનને.
(ક્રમશ:)