સંયોગ સુખ

આવે નૈ ઓડકાર આંખ્યુંને ત્યાં લગ,

પિયૂ નીરખીએ સૈ.

ઝગમગતા ભાલે એના કુમકુમના ચાંદલાને,

નીરખી હરખીએ્ સૈ.

ગોંદરેથી ભાળ્યો મેં ગમતીલો જણ તૈં હૈયામાં ઊગી'તી ધરપત !

મથોડા લગ પાણી કોરીકટ નદીયુંમાં ઘૂઘવતું જાય જાણે ઝબઝબ!

કરગઠિયા જેમ મારી વેદનાયું સળગી ત્યાં,હળવી હું સામટી થૈ.

એવો પિયુ નીરખીએ સૈ.

ઢોલિયામાં પોઢેલો એવો દેખાતો કે નીરખતા રાત્યું રે જાશે !

પીવાતું રૂપ એનું આંખેથી ઘટઘટ નીંદરડી મારી કે'વાશે !

પાંપણને વારું કે મટકું'ય આંખ્યુંમાં હવે, એકપણ આવે નૈ.

એવો પિયુ નીરખીએ સૈ.