સીધી વાત

આંસુમાંથી આંસુ નીકળ્યું,

એ પણ પાછું ખાસ્સુ નીકળ્યું,

રોક્યું પણ રોકાયું ના એ

જબરું હો કે ધાંસુ નીકળ્યું,

માન્યું તું મજબૂત મેં એને,

પણ એ નબળું પાસું નીકળ્યું,

સીધેસીધું વહેતું ક્યાં એ?

વાંકુચૂંકુ ત્રાંસુ નીકળ્યું,

નહિ શિયાળો નહિ ઉનાળો,

ભરપૂર એ ચોમાસું નીકળ્યું,

વહુને જશ મળતો ક્યાં કો'દિ?

વઢકારી એ સાસુ નીકળ્યું,

એણે ખાધું મેં પણ ખાધું,

ચેપી રોગ બગાસું નીકળ્યું,

મીઠાબોલાં લોકો મોઢે,

શબ્દેશબ્દ પતાસું નીકળ્યું,

મૃત્યુ આવ્યું ત્યારે લાગ્યું,

"શિલ્પ" જીવન જિજ્ઞાસુ નીકળ્યું.