શ્યામ + મોરપીચ્છ = ગોપી

શ્યામ! તમે મોરલી વગાડો હું નાચું!

શ્યામ! તમે કાગળિયો ખોલો હું વાંચું!

ઓચિંતા ડાળ એક ઝૂલી રે સંગલાલ,

ગુલમ્હોરી સપનાઓ વાગ્યા…..

ભીતરમાં પાંદડિયું ખુલી રે સંગલાલ,

છલ – છલ કસુંબાઓ માગ્યા…..

શ્યામ! તમે મોરપીચ્છ ખોંસો ઈ સાચું!

શ્યામ! તમે મોરલી વગાડો હું નાચું!

આંગણમાં વેરાણા મોતી ઓ મણીયારા,

મોતીડે મોતીડે ધબકારાં……!

ધબકારાં કેમ કરી વીણું ઓ મણીયારા,

ધબકારાં આંખ્યુંના પલકારાં……!

શ્યામ! તમે બોલો નહિ તો બધું કાચું!

શ્યામ! તમે મોરલી વગાડો હું નાચું!