રાખ
રાખ
અજંપાની અંતિમ રાતે
ચિતાનાં લાકડા પર ગોઠવ્યો હોય
મને મારા વ્હાલસોયા સ્વજનોએ;
ને તું સ્મરણ બની, મને દાહ આપે,
ને ભળભળ ભડકે
મારા દેહની ભીતર પથરાયેલો
તારા વિનાનો આગઝરતો ખાલીપો;
ને રાતમાં હું રાખ-રાખ.
પરોઢ ફૂંટે, તું ઉઠે, પડખું ફરે ને તને કશુંક ખૂટે,
ને જે ખૂટે એ હું.
તું તૂટે કોઈ કાચની માફક,
ને મારા નામની પોક મુકે,
તું પાલવ ફેલાવી દોટ મૂકે,
ને હું ચેહમાંથી બેઠો થાઉં ને દોડું,
વળગી પડું તારા દેહને,
રાખની ડમરી બનીને.