પરાજિતનું ગાન

પરાજિતનું ગાન :

ગા મન, પરાજિતનું ગાન.

એકલ પરાજિતનું ગાન.

પરાજિત સેનાપતિનાં

પંથ ને મેદાન સૂનાં :

શમ્યાં છે સન્માન જૂનાં :

વિજન પુરની ગલીગલીએ

તો ય ગાજે ગાન,

ઓ મન ! પરાજિતનું ગાન !

પરાજિત પાછો વળે

સજવા નવાં આયુધ,

જનેતાને સ્તનથી

પીવા અભયનાં દૂધ.

કોણ સૂતા કોણ જાગે,

કોણ જખમી દવા માગે,

પૂછતો પ્રેમાળ રાગે

ભમે છે મહેમાન :

ગા મન ! પરાજિતનું ગાન.

પરાજિતનો ચાંદલો : કંકુ તણો :

પરાજિતનાં છત્ર ચામર વીંઝણો :

પરાજિતના લખોમુખ યોદ્ધાગણો:

સહુ વિરામ્યાં, એક નવ વિરમો

બિરદનું ગાન !

ગા મન પરાજિતનું ગાન :

એકલ પરાજિતનું ગાન.