મમતાનો નહીં પાર
મમતાનો નહીં પાર
મને મળ્યા રે મા હેત તારા એવા,
મીઠાં મીઠાં મધના ટુકડા જેવા,
હે મા તારી મમતાનો નહીં પાર !
કડવી દવાના ઘૂંટ ભલે તું પીવડાવે,
તારી લાગણીના સાગરમાં નવડાવે,
હે મા તારી મમતાનો નહીં પાર !
નીંદમાં પોઢાડવા હાલરડાં સંભળાવે,
આંગળી પકડી તું ચાલતા શીખવે,
હે મા તારી મમતાનો નહીં પાર !
યોગ્ય સંસ્કાર થકી ઘડતર કરે,
હેતના હાલરડે માતા તું ઝુલાવે,
હે મા તારી મમતાનો નહીં પાર !
નવ નવ માસ દુઃખડા સહેતી,
નવું સર્જન દેહ થકી કરતી,
હે મા તારી મમતાનો નહીં પાર !
નિ:સ્વાર્થ તારી લાગણી વહેતી
બાળક કાજે દુનિયા ભૂલતી
હે મા તારી મમતાનો નહીં પાર !