Library
મહેફિલમાં
મહેફિલમાં
ચાલ આજ પતંગની મહેફિલમાં ઝૂમ ઝૂમ નાચી લઈએ;
આશાની દોરીઓ ગગને વિહાર કરી મસ્તીમાં ઊડી લઈએ....!
ચાલ આજ પતંગની મહેફિલમાં........
રંગબેરંગી આકાશે મેઘધનુષ્ય બની અજાણ સંગ ઊડી લઈએ;
ફિરકી લઈ હાથોમાં દોરીની ઢીલ આજ હળવેથી છોડી દઈએ ....!
ચાલ આજ પતંગની મહેફિલમાં........
હૈયું હરખાય ચાલ ધાબે જઈ મનગમતું ચોમેર જોઈ લઈએ;
કન્ના બાંધી છે રૂડી પ્રીતની આજ એને એક મેકને જોડી દઈએ...!
ચાલ આજ પતંગની મહેફિલમાં........
તલ લાડુ ચિક્કીની મીઠાશ મોંમાં આજ થોડી મમળાવી લઈએ;
સ્વજન સંગાથ સગપણની દોરીઓ ખાસ આજ ગૂંથી દઈએ...!
ચાલ આજ પતંગની મહેફિલમાં........
મહેકી ઊઠેલ આભલાની ધાર પૂંછડીઓ થઈ સજાવી લઈએ;
વ્હાલપનું વ્હાલ આજ પવનવેગે ચેતન બનીને વરસાવી દઈએ...!
ચાલ આજ પતંગની મહેફિલમાં........
કાપીને ક્રોધ, લોભ, મોહ માયા બધી મનડાને મલકાવી લઈએ;
એક્મેક આંખોમાં પ્રીતની પેચને દૂર દૂર હરદમ લડાવી દઈએ...!
ચાલ આજ પતંગની મહેફિલમાં........
આવ્યો રૂડો મકરસંક્રાંતિ પર્વ ઉત્સાહથી આજ વધાવી લઈએ;
છોડી પ્રેમતણી દોરી આકાશભણી ઉડાન પતંગની લગાવી દઈએ.!
ચાલ આજ પતંગની મહેફિલમાં........
