માણસ છીએ

માણસ છીએ ક્યારેક લડી લઈએ છીએ,

તો ક્યારેક સાથે મળીને હસી લઈએ છીએ,

માણસ છીએ ક્યારેક કાતર બની તોડી દઈએ છીએ,

તો ક્યારેક સોય બની જોડી દઈએ છીએ,

માણસ છીએ ક્યારેક કોઈકને દુઃખી જોઈ દુઃખી થઈએ છીએ,

તો ક્યારેક કોઈકનું દુઃખ જોઈ મનમાં હસી લઈએ છીએ,

ક્યારેક માગેલું નાં મળે તો ભગવાન સાથે લડી લઈએ છીએ,

ક્યારેક વણ માંગેલું મળી જાય તો ઈશ્વરનો આભાર માની લઈએ છીએ,

માણસ છીએ ક્યારેક દુઃખમાં ભાંગી પડીએ છીએ,

તો સુખમાં થોડું અભિમાન કરી લઈએ છીએ,

માણસ છીએ ક્યારેક ઈશ્વરના સર્જેલા માનવીને અવગણી મંદિરમાં દાન પુણ્ય કરી લઈએ છીએ,

તો ક્યારેક ભૂખ્યાને ભોજન આપી ઈશ્વરની આરાધના કરી લઈએ છીએ,

માણસ છીએ ક્યારેક ધન સંપત્તિની પાછળ આંધળી દોટ મૂકીએ છીએ,

તો ક્યારેક ઘરમાં રહેલા માતાપિતાને રાજી કરી ઈશ્વરને પણ મનાવી લઈએ છીએ,

માણસ છીએ ક્યારેક ખોટા લોકોની તરફેણ કરી લઈએ છીએ,

તો ક્યારેક સાચા ને જીતાડી દઈએ છીએ,

માણસ છીએ ક્યારેક આત્માને છેતરી લઈએ છીએ,

તો ક્યારેક સારા કર્મો કરી આખરતનું ભાથું બાંધી લઈએ છીએ,

માણસ છીએ જાણે અજાણે ઘણી ભૂલો કરી લઈએ છીએ,

તો ક્યારેક ભૂલોનો પસ્તાવો પણ કરી લઈએ છીએ,

માણસ છીએ ક્યારેક સારું તો ક્યારેક ખરાબ કરી લઈએ છીએ.