કોણ શીખવતું હશે ?
કોણ શીખવતું હશે ?
આ ફૂલોને ખીલવાનું કોણ શીખવતું હશે ?
આ પવનને ફેરિયો બની ગલી ગલી સુગંધ ફેલાવવાનું કોણ શીખવતું હશે ?
વિના ઘડિયાળ કે વિના પંચાંગ, આ પ્રકૃતિને નિયમિત રહેતા કોણ શીખવતું હશે ?
મધરાતે પણ મહેકે આ મોગરો,
દિવસ રાત જોયા વગર કામ કરવાનું કોણ શીખવતું હશે ?
આ રણમાંય મહેકે, આ બાગે પણ મહેકે, આ ઘર આંગણે પણ મહેકે,
આ રંકને પણ એવી જ સુગંધ આપે,
જેવી રાજાને આપે.
ફૂલોને આ નૈતિક મૂલ્યો કોણ શીખવતું હશે ?
શું આ પ્રકૃતિ પાસે કોઈ કૅલેન્ડર હશે ?
પાનખરે ના ઉદાસ બને,
વસંતના વૈભવે પણ ના કરે અહંકાર.
આ પ્રકૃતિને ગમે તે પરિસ્થિતિમાં સ્થિર રહેતા કોણ શીખવતું હશે ?
આ વૃક્ષોને પરોપકારી સંત જેવા બનવા
કોણ પ્રેરતું હશે ?
આ પ્રકૃતિમાં આટલા બધા રંગો,
કોણ પૂરતું હશે ?
આ માનવીના મનમાં સપનાઓના અવનવા રંગો કોણ ભરતું હશે ?
આટલા સુંદર કાર્યો પછી, શું એને જાહેર થવાની કોઈ ઈચ્છા નહિ થતી હોય ?
શું ઈશ્વરને મનુષ્યની રૂબરૂ મુલાકાત લેવાની ઈચ્છા નહિ થતી હોય ?