હોળી પ્રગટાવ્યા પહેલા

અહમને નાખો ઓગાળી, હોળી પ્રગટાવ્યા પહેલા,

ઘમંડને દો બાળી, હોળી પ્રગટાવ્યા પહેલા.

મેં આમ ને તેં તેમ કીધુંની ઝેરીલી ભાવના,

જીવનમાંથી દો ચાળી, હોળી પ્રગટાવ્યા પહેલા.

દિલો-દિલો વચ્ચેનું અંતર વધે જેનાથી,

એ વાતને દો ટાળી, હોળી પ્રગટાવ્યા પહેલા.

મનને બગાડનારા થશે હુમલા અનેક,

છટકો દઈ હાથતાળી, હોળી પ્રગટાવ્યા પહેલા.

થયેલ બોલાચાલીની ‘સાગર’ કરો માફા-માફી,

જિંદગી અપનાવો રૂપાળી, હોળી પ્રગટાવ્યા પહેલા.