દીકરી

આંગણું ઘરનું સજાવે દીકરી,

પ્રેમનાં પુષ્પો  ઉગાડે દીકરી.

.

જીંદગીની  ફૂલવારીમાં  સદા,

સ્નેહનાં સીંચણ વહાવે દીકરી.

ભાઈની વ્હાલી છે બેની એ ઘણી,

લાડ ભાઈને  લડાવે  દીકરી.

માત-પિતાની ખુશી ચાહે સદા,

દર્દ ખુદનાં ત્યાં છુપાવે દીકરી.

સ્વપ્ન પુરાં સૌ કરે એ અન્યનાં,

ખુદનાં તો શમણાં ભુલાવે દીકરી.

સ્નેહ ને સંસ્કારના દીપક વડે,

સાસરું, મહિયર દિપાવે દીકરી.

સર કરે શિખરો અનોખા એ ઘણાં,

નામના કાયમ કમાવે દીકરી.