ચાલને આજે રંગ – રંગ રમીએ...!!

ગમતાને તો સહુ કોઈ ગુલાલ ચોપડે,

પણ આજે તો અણગમતાને રંગીએ,

ચાલને આજે રંગ - રંગ રમીએ...!

નાનપણમાં જેમ કિટ્ટાના,

બુચ્ચા તરત કરી દેતા હતા,

તેમ આજે પણ રીસાઈ ગયેલા,

ભેરુઓને પ્રેમથી મનાવીએ,

ચાલને આજે રંગ - રંગ રમીએ !

અવીરત વહેતા કાળના પ્રવાહમાં,

કંઈ કેટલીય ગુંચ પડી ગઈ છે,

ચાલને આજે તેને રંગભીના હાથે,

ઉકેલવાનો પ્રયત્ન કરીએ,

ચાલને આજે રંગ - રંગ રમીએ...!

સફળતાની ઘોળદોડમાં ખબર ના રહી,

કે મતભેદ ક્યારે મનભેદ થઇ ગયા,

અબોલાનું કારણ ભૂલી જઈ,

ચાલ તેને સામે ચાલીને ગળે વડગાડીએ,

ચાલને આજે રંગ - રંગ રમીએ !

જાણે બગડેલી બાજી સુલટાવવા જ,

આ અવનવા તહેવારો આવે છે,

હોળીના આ સપરમાં દહાડે ચાલ,

આ વર્ષે અભેદ્તાના રંગે રંગાઈએ,

ચાલને આજે રંગ - રંગ રમીએ !