పల్లెతనం

పరిమళించు పల్లెతనం..పంచడమే పని ఇప్పుడు..!

అందమైన అడవి మనసు..నిలపడమే పని ఇప్పుడు..!

స్వచ్ఛతకై పరుగులేల..ఆ తలపే అసలు ధనం.. 

మంచుపూల మేఘమల్లె..కదలడమే పని ఇప్పుడు..! 

ఎంత మండు సూర్యుడైన..కాల్చలేడు కాలుష్యం.. 

ఈ పుడమిని నందనవని..చేయడమే పని ఇప్పుడు..! 

మదిలోపలి కల్మషాలు..తొలగించే మందు కలదు.. 

చిరునవ్వుల పూలతోట..పెంచడమే పని ఇప్పుడు..! 

కోపమొస్తె రానీలే..నీ కోపం పారిపోగ.. 

చెలిమిచెలమ తీర్థంలా..మిగలడమే పని ఇప్పుడు..!