పడిగాపులు

ఎంత గొప్ప కానుకోయి..ఈ తియ్యని పడిగాపులు..! 

నీ సన్నిధి చేరుటకే..కను మలగని పడిగాపులు..! 

ఆలోచన లాగిపోయి..ఎన్నియుగా లయ్యిందో.. 

వలపులేల విసిరినావొ..ఇవి మాయని పడిగాపులు..! 

చుట్టేసే సుడిగాలిగ..వస్తావను ఆశ చూడు.. 

ప్రేమపూల వానలోన..గోర్వెచ్చని పడిగాపులు..! 

ఈ 'శార్వరి' కోకిలమై..పాడుతోంది రేయంతా.. 

నీ అడుగుల సడి వినగా..తనువెరుగని పడిగాపులు..! 

తెలవారగ చూడలేను..కోరలేను మరి ఏదీ.. 

నీ జతలో కరిగేందుకు..మది చెదరని పడిగాపులు..!