మనసా

చుట్టమని చెప్పుకొని వచ్చారురా
చుట్టూ చేరి నవ్వారురా
కడుపులో మాటను దాచారురా
కథలెన్నో అల్లుకొని పోయారురా
ఉన్నప్పుడు "మనవాడే" అన్నారురా
లేనప్పుడు ముఖమే తిప్పారురా
కష్టం వచ్చి తలుపు తట్టగానే
కనిపించకుండా మాయమయ్యారురా!
పండుగ వస్తే పట్టుచీరతో
పలకరింపులు తెచ్చారురా
పూట గడవని పరిస్థితి వస్తే
పిలిచినా పలకక పోయారురా
విందు భోజనం పెడితే చాలు
వీధి చివర నుంచే వస్తారురా
బాధను కొంచెం పంచుకోమంటే
బంధం మరిచి పోతారురా!
ఇల్లు కట్టితే దగ్గరవుతారు
ఇబ్బంది వస్తే దూరమవుతారు
డబ్బులు ఉంటే దేవుడంటారు
అడిగితే మాత్రం తప్పించుకుంటారు
ఎదుట నిలిచి పొగిడే వారే
వెనుక చేరి విషం చిమ్ముతారు
మనం ఎదిగితే ఓర్వలేక
మాటలతోనే కిందకు లాగుతారు!
అన్నదమ్ముల మధ్యన చేరి
అగ్గిపుల్లను వేస్తారురా
అక్కాచెల్లెళ్ల ప్రేమను చూసి
అసూయతోనే రగిలిపోతారురా!
"నీ మేలుకోసమే చెబుతున్నా" అంటూ
నీడలో గోతులు తీస్తారురా
నిజం తెలిసిపోయేలోపు మన ఇంటిని
నిలువునా విడదీసి పోతారురా!
ఆస్తి దగ్గర బంధం పుట్టెను
అవసరం తీరగానే చచ్చెను
కాగితంపై సంతకం పడగానే
కన్న ప్రేమ కూడా మారెను
నిన్నటివరకు "మనవాడే" అన్నారు
నేడు నువ్వెవరో అడిగారు
పంచుకున్న బాల్య జ్ఞాపకాలను
పైసల కోసం మరిచిపోయారు!
చుట్టలందరు చెడ్డవారు కాదు
చెంత నిలిచే మంచివారున్నారు
మన కన్నీటిని తమదిగా భావించి
మనకోసం ఏడ్చేవారున్నారు
కష్టంలో చేయిని అందించినవారిని
కడవరకు మరువకుండా ఉండాలిరా
మాటలో కాదు, చేతల్లో చూపే
మనిషినే చుట్టమనుకోవాలిరా!
రక్తం కలిస్తే చుట్టం కాదురా
మనసు కలిస్తే సొంతమురా
అవసరానికి వచ్చే బంధం కన్నా
ఆపదలో నిలిచే స్నేహం గొప్పదిరా
చుట్టమని చెప్పే ప్రతి మనిషిని
గుడ్డిగా నమ్మకు ఓ మనసా
నీ కన్నీటిలో తోడుగా నిలిచిన
ఆ ఒక్కరినే మరువకు మనసా!