గురువు

బుద్ధిలేని నా మనసుకు..తానేగా గురువు..!

అనుభవాల ఈ బడిలో..క్షణమేగా గురువు..!

ఆశపడే ముచ్చటలే..అగచాట్లుగ మిగులు..

పలుకు ప్రేమ సరిగమలకు..చినుకేగా గురువు..!

వింతగాలి చిరుహాసం..ఆలకింతు రెవరు..

శ్వాసలేలు మౌనానికి..మెఱుపేగా గురువు..!

భాషలేని వేదమేదొ..నదిలాగా మదిని..

చెలి మోహన రాగానికి..రుతువేగా గురువు..!

చూచు దృష్టి బాగుందా..జగము శాంతి వనము.. 

నిదానముగ గమనిస్తే..లఘువేగా గురువు..!

నేర్పువారు నేర్పరులే..పరులెవ్వరు లేరు..

నేర్చుకునే అభిలాషకు..ఓర్పేగా గురువు..!