బ్రతుకు నాటకాలు

బ్రతుకు నాటకాలు నేర్చుకోకముందు .

అచ్చం గా మనం జీవించిన ఆ బాల్యపు పొద్దు 

ఎంత స్వచ్ఛంగా పిలుచుకునే వాళ్ళం 

ఒరేయ్ ,పోరా ,రారా అనుకుంటూ .

అందరి నెత్తుటి వర్ణం ఒకటేనని తెలుసు మనకు కొట్టుకు పోయిన మోకాళ్ళకు ఉమ్ముతడి పూసుకుని 

చేయి చేయి కలుపుకొని మళ్లీ పరుగులెత్తేవాళ్ళం .

ఈ లోకమొక ఆటస్థలమని ఎరిగిన తత్వజ్ఞానులం .

పట్టాలు పుచ్చుకోని పుట్టు మేధావులం .

వర్షించే ఆకాశపు అభినయాన్ని చప్పట్లతో 

ప్రోత్సహించేవాళ్ళం .

ప్రసవించిన స్త్రీ తలనిమిరిన తండ్రిలా 

మట్టిని మమకారం తో తాకే వాళ్ళం .

సుతి మెత్తని గాలిని అతి ఘాడంగా 

కౌగిలించుకొనే వాళ్ళం .

ఎంత పెద్దరికాన్ని ప్రదర్శించే వాళ్ళం మనమప్పుడు.

కానీ రాను రానూ ...చిన్నవాళ్లమైపోతున్నాం .

చిన్నబుచ్చు కోవాల్సిన పనులుచేసేస్తున్నాం .