ଚିରା ପଣତ
ଚିରା ପଣତ
ହାଡ଼ଭଙ୍ଗା ଶୀତ ହେଉଛି ଏମିତି
ଦେହଟା ଯାଉଛି ଥରି
ତଥାପି ବାହାରେ ମାଆଟେ ବସିଛି
ଛୁଆକୁ ତାହାର ଧରି ।
ତା' ପାଖରେ ନାହିଁ କନ୍ଥା କି କମ୍ବଳ
ପଣତ ଘୋଡେଇ ହୁଏ
ଉଷୁମୁ କୋଳରେ ଛୁଆକୁ ତାହାର
ଜାବୁଡି ସେ ଧରି ଥାଏ ।
ଦୋକାନ ବାରଣ୍ଡା ସାଜିଅଛି ପରା
ତପାଇଁ ଆଶ୍ରୟସ୍ଥଳୀ
ନିଜର ଲୁହକୁ ନିଜେ ପିଉଅଛି
ଆଖିରୁ ତାହାର ଢାଳି ।
ଦୁଃଖର ପାହାଡ଼ ସହି ସେ ଯାଉଛି
ସନ୍ତାନ ମୁହଁକୁ ଚାହିଁ
କୁହୁଡି କାକର ଆକାଶୁ ଝରିଲେ
ଧରୁଛି ସିଏ କୁଣ୍ଢେଇ ।
ଛିଣ୍ଡା ପଣତର ଉଷ୍ମତା ଆଦରି
ଶିଶୁ ସିନା ଶୋଇଯାଏ
ଶିଶୁର ନିଦକୁ ଚାହିଁ ଚାହିଁ ପରା
ମାଆ ରାତି ପାହିଯାଏ ।
ଶୀତରେ କମ୍ବଳ ଘୋଡେଇ ଶୁଅନ୍ତି
ଆନନ୍ଦରେ ନିଜ ଘରେ
ହେଲେ ଏହି ମାଆ ରହିଥାଏ ସଦା
ସକାଳର ଅପେକ୍ଷାରେ ।
କେତେ ଆଶା ସିଏ ବାନ୍ଧିଛି ମନରେ
ଶିଶୁକୁ ତାହାର ନେଇ
କିଏ ଜାଣେ କେବେ ସ୍ବପ୍ନ ସତ ହେବ
ନିଜେ ସିଏ ଜାଣେ ନାହିଁ ।
ବୁଝିବ ନିଶ୍ଚିତ ଶିଶୁଟି ତାହାର
ଚିରା ପଣତର ମୂଲ୍ୟ
ହେଲେ ଜୀବନରେ କିଛି ନାହିଁ ଆଉ
ମାଆ ପଣତର ତୁଲ୍ୟ ।
****
ପ୍ରଶାନ୍ତ କୁମାର ନାଥ
ସୁନ୍ଦରପୁର,ଉତ୍ତରକୂଳ ହାଟ, ପ୍ରୀତିପୁର,ଯାଜପୁର ।
ମୋ-୦୮୮୯୨୩୦୧୧୪୩