ସିଧାକଥା ୬୮

ହାରିଗଲେ କେବେ ପଳାଇବା ନାହିଁ

ଆଉଥରେ ଲାଗିଯିବା,

ଦ୍ଵିତୀୟ ତୃତୀୟ ଚତୁର୍ଥ ଥରକୁ

ଆମେ ହିଁ ଆଗରେ ଥିବା ।

ଥକି ପଡ଼ିବାନି କେବେ ଡରିବାନି

ଶିଖିବା ବିଶ୍ରାମ ନେଇ,

ଆତ୍ମା ବିଶ୍ୱାସକୁ ବଢ଼ାଇଲେ ନିଶ୍ଚେ

ଆଗକୁ ଯିବା ଆଗେଇ ।

ପ୍ରତିକୂଳ ପରିସ୍ଥିତିରେ ଚାଲିବା

ଯଦି ଦରକାର ହୁଏ,

ସେଥିପାଇଁ ଲୋଡ଼ା ଅଭ୍ୟାସ ନିଶ୍ଚୟ

ଦୃଢ଼ମନ ଶେଷଯାଏ ।

କଥା କହୁକହୁ ଉଚିତ ଶବ୍ଦଟି

ଯଦି ମନେପଡ଼େ ନାହିଁ,

ମୁଚୁକୁନ୍ଦ ହସ ହସିଦେଲେ ଶ୍ରୋତା

ଖୁସିରେ ରହିବେ ଚାହିଁ ।

ଶୂନ୍ୟସ୍ଥାନଟିକୁ ଅତି ସହଜରେ

ପୂରଣ କରିବ ହସ,

ମୁରୁକି ହସରେ ଭାଷା-ଭାବ ଆଉ

ରହିଛି ମଧୁର ରସ ।

ଈଶ୍ୱରଙ୍କ ଇଚ୍ଛା ବଦଳିବ ନାହିଁ

ଯେତେ ବି ପ୍ରାର୍ଥନା କଲେ,

ପ୍ରାର୍ଥନା ବଳରେ ଆମ ଇଚ୍ଛା କିନ୍ତୁ

ବଦଳିବ ବଳେବଳେ ।

ସିଧାକଥା