આ વરસાદ તુજ વિન મને ગમતી નથી

તારી યાદોની ઝરમર એક પળ થંભતી નથી,

આ વરસાદ તુજ વિન મને ગમતી નથી..

 

આકાશે મીટ માંડી બેઠું'તુ ચાતક,

વર્ષાએ દીધી એની આંખોને રાહત

હેતની હેલી વિન તૃષ્ણા મનની છીપતી નથી,

આ વરસાદ તુજ વિન મને ગમતી નથી..

 

અષાઢી મોરલો મારે આંગણે ટહુકતો,

વરસાદી વાયરો મને સ્પર્શે અછડતો

તોય એષણા મનની થનગનતી નથી,

આ વરસાદ તુજ વિન મને ગમતી નથી..

 

ડાળે ડાળે પંખીઓના મિલનની છે ચહેક,

મારા શ્વાસોમાં સમાઈ છે ધરતીની મહેક

પ્રકૃતિની શોભા આજ મનને જચતી નથી,

આ વરસાદ તુજ વિન મને ગમતી નથી..

 

આ વાદળોનો ગડગડાટ મુજને પજવતો,

આ વિજનો ચમકારો મારી આંખોને કનડતો

મૂશળધારેય અગન મનની શમતી નથી,

આ વરસાદ તુજ વિન મને ગમતી નથી..

 

ભીની ભીની આંખો તુજને પોકારે,

કોરું કોરું મન ભીંજવાની રાહ નિહાળે

આવ હવે, આ વેળા વિરહની વિતતી નથી

આ વરસાદ તુજ વિન મને ગમતી નથી..