ହାଲିଆ ହକ

ଉଦୁଉଦିଆ ଖରା ମାରୁଥିଲା l ଚାରିଦିଗରେ ଲୋକଙ୍କ ଭିଡ ଜମିଥିଲା l ବଜାରରୁ ପରିବା କିଣି ଫେରୁଥିଲେ ଦୁଇ ବନ୍ଧୁ ଦିଲିପ ଓ ଅକୃର l ଫେରିବା ବାଟରେ ଏକ ଜଳଖିଆ ଦୋକାନରେ ନେଇଥିବା ଲୁନାଗାଡ଼ିଟିକୁ ରଖିଦେଇ ଜଳଖିଆ କରୁଥିଲେ l ହଠାତ ତାଙ୍କ ପାଖରେ ଆସି ପହଂଚିଗଲା ଏକ ପୋଲିସ ଗାଡ଼ି l କିଛି ଭାବିବା ଆଗରୁ ଦୁଇ ଜଣଙ୍କୁ ନେଇ ଚାଲିଗଲେ ଜିଲ୍ଲାର ମୁଖ୍ୟ ଥାନାକୁ କଏଦୀଙ୍କ ଭଳି!

     ମାତ୍ର ଦୁଇ ବନ୍ଧୁଙ୍କ ମୁଖରେ ଏକ ନବନିର୍ମାଣର ଝଲକ ଝଲସି ଉଠୁଥିଲା ସେଇଦିନ l ଯେମିତି ଲାଗୁଥିଲା ସେମାନେ ନିର୍ଦୋଷ ଥିଲେ l ଅଜଣା ଲୋକେ କାବାହୋଇ ଅନେଇ ବସିଥିଲେ l ଆଉ ଜାଣିଲା ଲୋକେ ଖବରକୁ ନେଇ ସେମାନଙ୍କ ଗାଁ ଗୁଡିକରେ ହଇଚଇ ସୃଷ୍ଟି କରୁଥିଲେ l କିଛି ମୁହୁର୍ତ୍ତରେ ଖବର ସାରା ଇଲାକାରେ ଖେଳିଗଲା l ଗ୍ରାମ ଲୋକେ ଖବରର ତଦାରଖ କରିବାକୁ ଲାଗିଗଲେ l ଶେଷରେ ଗ୍ରାମର ବିଶେଷ ବ୍ୟକ୍ତିଙ୍କ ଦ୍ୱାରା ଜଣାଗଲା ଯେ ଏହା ଏକ ଷଡଯନ୍ତ୍ର l ସ୍ୱାର୍ଥ ହାସଲ ପାଇଁ କେତେଜଣ ମନ୍ଦବୁଦ୍ଧିଙ୍କ ଦ୍ୱାରା ଏତଲା ଦେଇ ସେଇ ଦୁଇ ଜଣ ସହ ଗ୍ରାମର ଆଉ ପାଞ୍ଚ -ଛଅ ଜଣଙ୍କୁ ଥାନାରେ ରଖି କାର୍ଯ୍ୟ ହାସଲ କରିବା ତାଙ୍କର ଲକ୍ଷ୍ୟ ଥିଲା l