Best summer trip for children is with a good book! Click & use coupon code SUMM100 for Rs.100 off on StoryMirror children books.
Best summer trip for children is with a good book! Click & use coupon code SUMM100 for Rs.100 off on StoryMirror children books.

Panchanan Jena

Inspirational


4.4  

Panchanan Jena

Inspirational


ଘର ମୂରୁଜ

ଘର ମୂରୁଜ

11 mins 104 11 mins 104

ବୁଧବାର ନୂଆଗାଁ ସାପ୍ତାହିକ ହାଟରୁ ଫେରୁ ଫେରୁ, ଘର ଆଗରେ ହିରେ।ହୋଣ୍ଡା ଗ୍ଲାମର ବାଇକରେ ସାଇଡ୍ ଷ୍ଟାଣ୍ଟ ମାରୁ ମାରୁ, ମୁଣ୍ଡରୁ ହ୍ୟାଲମେଟ୍ ଓ ସମ୍ବଲପୁରୀ ଖାଣ୍ଟି ଓଡ଼ିଆ ହାତ ତିଆରି ଆତ୍ମନିର୍ଭରଶୀଳ ମାସ୍କ୍ ଉତାରୁ ଉତାରୁ,ପରିବା-ମାଛ-ସଉଦା ବ୍ୟାଗ୍ ସବୁ ଧରୁ ଧରୁ, ଭାଟ- ଭିକାରୀ ପରି ବକର ବକର ଗାରୁ ଗାରୁ ମାରୁ ମାରୁ ହେବା ବେହେରା ( ପିନାକୀ ଚରଣ ବେହେରା )ବାବୁଙ୍କର ହାଟପାଳିଆ ଅଭ୍ୟାସ କହିଲେ ଭୁଲ ହେବ । ବରଂ ବଦଭ୍ୟାସ ମସ୍ତବଡ଼ କୁ-ଅଭ୍ୟାସ କହିଲେ ବାଚନିକ ବ୍ୟାକରଣୀକ ଶୁଦ୍ଧତା ଶୁଭିବ ମାନିବ ।

ପରନ୍ତୁ ଘରଣୀ ପଦ୍ମଜା ଦେବୀ ରୋଷେଇ ଘରୁ କାମ କରୁ କରୁ ଆଉ ପାଦେ ଆଗକୁ ଯାଇ କୁହନ୍ତି---- ବେହେରା ବାବୁ ମୋ',ଆମ ପାଣିନୀ ବାପା ମୋ',ଖାଲି ଛିଟ ବେହିଆ ଛିଣ୍ଡା ପାବାରିଆ ଖଣ୍ଡି ଟାଉଟରିଆ ଧୋବ ଫରଫରିଆ । ସୁଆଦିଆ ତୁଣ୍ଡ ବଚନରେ ଚିକ୍କଣ ଚନ୍ଦନ ଚର୍ଚ୍ଚିତ ପଦେ ଅଧେ ଗଦେରେ କିଛି ପବନିଆ ଫମ୍ପା ବାହାଦୁରିଆ ଦି' ଚାରି ପଦ ନ କହିଲେ ନ ଭାସିଲେ, ନ କୁହାଟିଲେ ମଇଁଷି ଶିଙ୍ଗିଆ ନିଶ ହଳେର ସମ୍ମାନ ଯେମିତି ସାତ ତାଳ ପଙ୍କରେ କବର ନେଇ ଯିବ । ହାଟରୁ ଦି' ଚାରି ବ୍ୟାଗ୍ ଭର୍ତ୍ତି କରି ଆଣିଛନ୍ତି ତ, ହୁରି ନ ଛାଡ଼ି ରଡ଼ି ନ କରି ପାଞ୍ଚ ପଚିଶ ଗଲା ଅଇଲା ସାହି ପଡ଼ିଶାଙ୍କୁ ନ ଶୁଣେଇଲେ ତାଙ୍କ ଭାତ ହଜମ ହେବନି ; ତାଙ୍କ ବଂଶ ଆଭିଯାତ୍ୟର ଡେଙ୍ଗୁରାଟି ଅନ୍ତତଃ ସପ୍ତାହକୁ ଥରେ ବାଜିବାର ଅଛି ନା ! ନୋହିଲେ କୂଳ କୁଟୁମ୍ବକୁ ଲାଜ ସରମ ଲାଗି ଯିବ ମୋ !

କିନ୍ତୁ ଆଜି ଗାଡି ସାର୍ଟ ବନ୍ଦ ନ ହେଉଣୁ ଡାକ ପକେଇଲେ କୁହାଟ ଛାଡିଲେ ତାଙ୍କ ଗେଲବସରିଆ ଅଳିଅଳି ଝିଅ ପନୀ ( ପଙ୍କଜିନୀ)କୁ -- ଆଲୋ ମା' ପନୀ । ଧରିଲୁ ଟିକେ ବ୍ୟାଗ ଦି' ଟା । କହୁଥିଲେ ଓ ବାଁ ହାତରେ କପାଳରୁ ଝାଳ ପୋଛୁଥିଲେ । ସତରେ କି ପାଗ ? ଶ୍ରାବଣ ମାସରେ ବର୍ଷା ତ ଢାଳୁଛି କିନ୍ତୁ ଗୁଳୁଗୁଳି କମିବାର ନାଁ ଗନ୍ଧ କାହିଁ ? ଗ୍ଳୋବାଲ୍ ୱାରମିଙ୍ଗ ଏ ସବୁର କରୁଣ ପରିଣତି ବୋଧେ ।

ପୁଅ ପାଣି (ପାଣିନୀ ) ତ ଟିଉସନ୍ ଯାଇଛି ସକାଳ ପହରୁ। ଝିଅ ପନୀ ତ ଥିବ ଅନ୍ୟ କେଉଁ ଦୁନିଆରେ ସୋସିଆଲ ପ୍ଲାଟଫର୍ମରେ । ଗୀତ ବା ଭିଡିଓ ଦେଖୁଥିବ । ଗେମ୍ ଖେଳୁଥିବ । କର୍ଣ୍ଣଗୋଚର ହେଲେ ତ ଆସିବେ ବେଗି ପିଆଦା ପିଅନ ଅର୍ଦ୍ଦଳି ଭଳିଆ । 

କେହି ନ ଆସିବାରୁ ଓଦା ହାତକୁ ପଣତ କାନିରେ ପୋଛୁ ପୋଛୁ ଶ୍ରୀମତୀ ପଦ୍ମଜା ଦେବୀ ଚିରାଚରିତ ବକର ବକର ହେଇ ଆସିଲେ ଗେଟ୍ ପାଖକୁ -- ମୁଣ୍ଡରେ ବସେଇ ରଖିଛ ଗେହ୍ଲେଇ ଫୁଲେଇ ପନୀ ରାଈକୁ । ତୁମେ ଗଳା ଫଟେଇ ଡାକିଲେ ରାଜଜେମାଙ୍କୁ ଶୁଭିଲେ ତ ମହାରାଣୀ ହାଜିରା ଦେବାକୁ ଆସିବେ ! କାନରେ ଇୟର କଡ୍‌ ଗେଞ୍ଜି ଘର କୋଣରେ ଲମ୍ବା ଫୋନ୍‌ କେଞ୍ଚି ଚାଲିଥିବେ ତୁମ ଦୁଲାରୀ ଦୁହିତା । ପୂରା ଅଣ୍ଡିରା ଚଣ୍ଡୀ ହେଇଗଲାଣି । ସବୁ ବେଳେ ଫେସବୁକ - ଇନଷ୍ଟାଗ୍ରାମ- ଟୁଇଟର- ଜି ମେଲ - ଗୁଗୁଲ ମିଟ ଏମିତି କେତେ ଡିଜିଟାଲ ପ୍ଲାଟଫର୍ମରେ ତୁମ ଝିଅ ବର୍ତ୍ତମାନ ଗ୍ଳୋବାଲ ସିଟିଜେନ ହେଲାଣି । ତୁମେ କ'ଣ ବ୍ୟାଗବୁହା କୁଲି ଚାକରାଣୀ ଭାବୁଛ କି ? 

ପାଣି ଗିଲାସେ ପତ୍ନୀଙ୍କ ହାତରୁ ଧରୁ ଧରୁ ସୋଫାରେ ବସୁ ବସୁ ବେହେରା ବାବୁ ମୁଁହ ଖୋଲିଲେ ହସ ହସ ସଜୁଆ ମୁହଁରେ ଶୁଭ କଥା ପଦିଏ କହି ପକେଇଲେ -- ବୁଝିଲ ପାଣି ବୋଉ ! ଆମ ଗୁନା ଫୋନ କିରି ଥିଲା ଜଳେଶ୍ଵରରୁ ଆଜି ହାଟ ବେଳେ । ଭଲ ପ୍ରସ୍ତାବ କଥା କହୁଥିଲା ଆମ ପନୀ ପାଇଁ । ଆଗାମୀ ରବିବାରକୁ ନିଜେ ବରପାତ୍ର ପନୀକୁ ଦେଖିବାକୁ ଆସିବେ ବୋଲି କହୁଥିଲା । ପିଲାଟି ଗୋରା ତକ ତକ ସଫଟୱାର ଇଞ୍ଜିନିୟର ପୁନେରେ ଇନଫୋସିସରେ ଅଛି । ବାର ଲକ୍ଷ ବାର୍ଷିକ ପ୍ୟାକେଜରେ ଅଛି । ଫରେନ ବି ଯାଇପାରେ । କ'ଣ କହୁଛ ! 

ମୁଁ ବା କ'ଣ କହିବି ? କଳାହାଣ୍ଡି କଲେଜରେ ଅର୍ଥାତ ହାଣ୍ଡିଶାଳ - ରୋଷେଇ ସମ୍ଭାଳୁ ସମ୍ଭାଳୁ ମୋର ଦିନ ସମୟ ଗୁଡ଼ା ବାଛୁରି ଛୁଆ ପରି କୁଦା ମାରି ପଳେଇ ଯାଉଛି । ମୁଁ ହୁଣ୍ଡି ଗଵଗେଣ୍ଡୀ ଗୁଜରିଗେଣ୍ଡୀ ଗାଡ଼ରମେଣ୍ଢୀ କ'ଣ ବା ଭଲ- ଭେଲ ଜାଣିଛି ଯେ ? ପଚିଶ ପୁରି ଛବିଶ ଚାଲିଛି ଝିଅର । ଆମ ଗୁନା ଭଲ ଘର ଦେଖି କଥା ଚଲେଇ ଥିବ ନିଶ୍ଚୟ । ମା' ସିଙ୍ଗାରବୁଢୀ ସାହା ଭରସା ।--- କହୁ କହୁ ଘର ଭିତରକୁ ପଶିଗଲେ ।

ଅଗତ୍ୟା ପୁଅ ପାଣି ( ପାଣିନୀ ) ଟିଉସନ ସାରି ଘରେ ପହଞ୍ଚିଲା । ବେହେରା ବାବୁ ପୁଅ ପାଣିକୁ ଚୁମ୍ବକରେ କହି ପକେଇଲେ -- ବୁଝିଲୁ ପୁଅ ! ଆଗାମୀ ରବିବାରକୁ ତୋ' ପନୀ ଅପାକୁ ବରଘରୁ ଦେଖିବାକୁ ଆସିବେ । ତୁ ଘର ଦ୍ଵାର ସଫା ସୁତୁରା କରିବାରେ ମା'ଙ୍କୁ ଟିକେ ସାହାଯ୍ୟ କରିବୁ । ଘରର ସମ୍ମାନରେ ଯେମିତି ଆଞ୍ଚ ନ ଆସେ | ବେହେରା ଘର ଏକ ବଂଶୀୟାନ ଖାନଦାନୀ ପରମ୍ପରାର ସନ୍ତକ ଯୁଗେ ଯୁଗେ । ମନେ ରହେ ଯେମିତି !

ଘରଣୀ ପ୍ରଦ୍ମଜା ସୁନାଝିଅ ପନୀର ମଥାରେ ସ୍ନେହିଳ ପରଶ ଦେଉ ଦେଉ କହିଲେ -- ଶୁଣିଛୁ ପନୀ ! କେତେ କଷ୍ଟରେ ତୋ ଗୁନା ଦାଦା ଓ ଶାନ୍ତା ଖୁଡୀ ସୁନ୍ଦର ପ୍ରସ୍ତାବଟିଏ ତୋ' ପାଇଁ ଆଣିଛନ୍ତି । ସେମାନେ କୁଆଡେ ବଡ ବଡିଆ ଲକ୍ଷପତି କରେ।ଡପତି ଘର ବଂଶର ଜଳେଶ୍ଵରର I ସେଠି ମୋ ପନୀ ରାଜ କରିବ - ହୁକୁମାତି ଚଳେଇବ । ପୁଅ କୁଆଡେ ସଂସ୍କାରୀ । ପୁଣି ବଡ଼ ଚାକିରୀ ।

ବୋଉ ପଦ୍ମଜାଙ୍କ କଥା କି'ଏ ବା ଶୁଣେ ଯେ ଏ ଘରେ । ଝିଅ ପନୀ ବି ବ୍ୟତିକ୍ରମ ହୁଅନ୍ତା କିପରି ? ସେ ତା'ର ଫେସବୁକ୍ ଷ୍ଟାଷ୍ଟସ୍‌ ଆପଡେଟ୍ କରିବାରେ ବ୍ୟସ୍ତ ଏତେ ଯେ ଘର ପୋଡିଗଲେ ବି ସେ ବିନ୍ଦୁ ବିସର୍ଗ ଜାଣି ପାରିବନି । କି ଯୁଗ ଆସିଲା କେଜାଣି । ମୋବାଇଲରେ ଲାଗି ଲାଖି ରହୁଛନ୍ତି ଅଠାକାଠି ପରିକା ।

ଦୁଇ ହାତ ଧରି ହଲେଇ ଦେଲେ ମମତାମୟୀ ପଦ୍ମଜା । ମୁଣ୍ଡରେ ପଶୁଛି କି ? ତିନି ଦିନ ହାତରେ ଅଛି । ଟିକେ କଞ୍ଚା ହଳଦୀ ଫ୍ୟାସ ପ୍ୟାକ ମୁଲତାନି ମାଟି ସହିତ ରାତିରେ ଶୋଇବା ପୂର୍ବରୁ ଲଗେଇଲେ ହଳଦି ଗୁରୁଗୁରୁ କମକୁଟ ଚେହେରା ଝଟକି ଉଠନ୍ତା । ଗୋଦରେଜ୍‌ ତଳ ଥାକରେ ବମକେଇ ପାଟ ଶାଢୀ ପଡିଛି କେତେ କାଳୁ ।କୁଞ୍ଚ କରି ପିନ୍ଧିବା ଟିକେ ଅଭ୍ୟାସ କଲେ ରିହରସଲ କଲେ ରବିବାର ଦିନ ମଞ୍ଚସ୍ଥ ନାଟକରେ ନିର୍ଭସନେସ କଟିଯାଆନ୍ତା ।

ହେ ଭଗବାନ ! ଏ ଅବୁଝା ଝିଅକୁ ଟିକେ ସହବୁଦ୍ଧି ଦିଅ ଠାକୁରେ ! ଜୟ ଜଗନ୍ନାଥ ।

ସେହି ସମୟରେ ବାପା ବେହେରା ବାବୁ ଓ ପୁଅ ପାଣିନୀ ଆସୁ ଆସୁ --- ସେ ବେକାରିଆ କଥା ଛାଡ଼ ମୋ ! ବର ପରମେଶ୍ଵରକୁ ଆମ ପନୀ ପସନ୍ଦ ହେଲେ ହେଲା । ଘର ବଡ ହେଉ କି ଛୋଟ, ବଂଶ ନାମକରା ହେଉ କି ନ ହେଉ, ଦରମା ଲକ୍ଷେ ମାସକୁ ପାଉ କି ନ ପାଉ, ମୋର ଗୋଟିଏ କଥା । ଆମ ପନୀକୁ ପୁଅ ପସନ୍ଦ ହେଲେ ହିଁ ଯାଇ ବାହାଘର ହେବ । କାରଣ ପନୀ ଆମର ଗୋଟିଏ ବୋଲି କୋଡ଼ପୋଛା କୋଟିଏରେ ଗୋଟିଏ ଝିଅ । ଆଜି ଭଳିଆ ନାରୀ ସଶକ୍ତିକରଣ ଯୁଗରେ ତା'ର ମନ ପସନ୍ଦ ତା'ର ମତ ସିଦ୍ଧାନ୍ତ ଆମ ସମସ୍ତଙ୍କର ପସନ୍ଦ । ଫାଇନାଲ କହିଦେଲି । ସେତେ ବେଳକୁ ସୁକୁରୁ ସାକର ଫୁଟୁରୁ ଫାଟର ଯେମିତି ମୋ କାନରେ ନ ପଡ଼େ ?

ପଦ୍ମଜା ଦେବୀ କହିଲେ --- କାହିଁକି ପସନ୍ଦ ହେବନି ପନୀର ? ଗୁନା କାକା ଆଉ ଶାନ୍ତା କାକୀ କ'ଣ ଅନ୍ଧ ନା କଣା ? ସେମାନେ କୁଆଡେ କହୁଥିଲେ ପୁଅ ତ ଖାଣ୍ଟି ହୀରା -- ତକ ତକ ଗୋରା ଛଅ ଫୁଟିଆ ଡଉଲ ଡାଉଲ ସିନେମାର କେଉଁ ହିରେ।ଠାରୁ ବି କମ ନୁହଁ । ଟାଇଗର ଶ୍ରଫ୍ ଭଳିଆ । 

ଆପଣଙ୍କ ଦ୍ୱାରା ତ ଶାଗ ବି ଶିଝିବନି । ଯଦି କି'ଏ କିଛି ପ୍ରସ୍ତାବ ଆଣିଲା, ତେବେ ଛିଦ୍ର ବାହାର କରିବା - ବିନ୍ଧ ଗୋଜିବା - ବିଷ ବୁଣିବାରେ ତୁମେ ଅଣୁବୀକ୍ଷଣ ଯନ୍ତ୍ର ପକେଇ ନାଲି ଗାମୁଛା ପାଗ ଲଗେଇ ବସିଯିବ । ଧନ୍ୟ ତୁମର ଅଭ୍ୟାସ । ପଚିଶ ବର୍ଷର ସଂସାରୀ ଅଭିଜ୍ଞତାରୁ କହୁଛି ।

ପିନାକୀ ବାବୁ ବୁଝିଗଲେ ସହଧର୍ମିଣୀ ପଦ୍ମଜାର ରାଗ ବଢି ଗଲାଣି ତାଳୁ ଉପରକୁ । ସ୍ଥାନ ଛାଡ଼ିଦେବା ଶ୍ରେୟସ୍କର ।

ରବିବାର ଦିନ ଆସିଗଲା । ସୁନେଲି କିରଣରେ ଘର ଅଗଣା ଆଉଟା ସୁନା ପରିକା ହସୁ ଥିଲା । ସମୟ ଦଶଟା ବେଳକୁ ସବୁ ସଜବାଜ ଶେଷ । ସମସ୍ତେ ଗାଧୋଇ ପାଧୋଇ ଇସ୍ତ୍ରୀ କରା ସଫା ଲୁଗା- କୁର୍ତ୍ତା- ଧୋତି ପିନ୍ଧି ପ୍ରସ୍ତୁତ । କେବଳ ଜରପକ୍ଷ ଆସିବାକୁ ଅପେକ୍ଷା ପ୍ରତୀକ୍ଷା । ପନୀର ଗୁନା କାକା- ଶାନ୍ତା କାକୀ ବି ଆସି ଯାଇଛନ୍ତି । 

ଗୁନା କକା ବଡ଼ ଭାଇ ବେହେରା ବାବୁ ଓ ମା' ସମାନ ବଡ଼ ଭାଉଜ ପଦ୍ମଜାଙ୍କୁ ମୁଣ୍ଡିଆ ମାରୁ ମାରୁ କହୁଥିଲେ --- ବହୁତ ବଡ ପାଟି ଭାଇ । କୋଟିପତି ଆରବପତି ଜଳେଶ୍ୱରିଆ ବିଶ୍ଵାଳ ଘର-ପରିବାର ସହିତ ସମୁଦି- ସମୁଦୁଣୀ ହେବ । ତେଣୁ ଡିମାଣ୍ଡ ଟିକେ ଅଧିକା କହି ପାରନ୍ତି । ତୁମେ ଚୁପ୍ ଚାପ ମୁଣ୍ଡ ଟୁଙ୍ଗାରୀ ଦେବ । ମୁଁ ଅଛି ପରା । ସବୁ ସମ୍ଭାଳି ନେବି | 

କିନ୍ତୁ ଗୋଟିଏ କଥା ଷୋହଳ ଅଣା ସତ | ଏମିତି ବର ମନକୁ ମାନୁଥିବା ଘର ଅଚଳାଚଳ ସମ୍ପତ୍ତିବାଲା ଦ୍ଵାର ମିଳିବନି ଆଉ । ତେଣୁ ମୁଁ କ'ଣ କହୁଥିଲି କି, ଆମେ ଦୁଇ ପ୍ରାଣୀ ଶୟନେ ସପନେ ଥିବା ଜାଗରଣେ କ'ଣ ଭାବୁଥିଲେ କି --- ଏଭଳି ସୁବର୍ଣ୍ଣ ସୁଯୋଗ ହାତଛଡ଼ା କରିବା ବୋକାମୀ ହେବ । ନୋହିଲେ ପନୀ ଆମର ଘରେ ବସିବ ଆଉ ବର୍ଷେ । ଝିଅ ଆଉ ଘିଅ । 

ଝିଅ ତୁମର ଭାଇ । ଯାହା କରିବା କଥା ଯାହା କହିବା କଥା କକା ହିସାବରେ ମୋର କର୍ତ୍ତବ୍ୟ କରିଛି । ଶେଷ ନିଷ୍ପତ୍ତି ତୁମର ।--- କହୁ କହୁ ଗୁନା ଦାଦା ଅନ୍ୟ ବ୍ୟବସ୍ଥା ତଦାରଖ କରିବାକୁ ଭିତରକୁ ପଶିଗଲେ । ଆରେ ପାଣି --- କାହିଁ ଗଲୁ କିରେ ?

ଶାନ୍ତା ଖୁଡ଼ି ବି ପଦ୍ମଜା ପଛରେ ଓଡ଼ିଆଣୀ ଓଢଣୀ ଟାଣି କିଛି କହିଲେ --- ହଁ ବଡ଼ଭାଇ ! ପୁଅଟି ସଂସ୍କାରୀ । ଭଲ ଆଚାର ବିଚାର । ଯଦିଓ ଆଧୁନିକ ସୁଖ ସୁବିଧାରେ ଲାଳିତ ପାଳିତ, ପରିବାର ପାଇଁ ଗୁରୁଜନ ମାନଙ୍କ ପାଇଁ ଅନେକ ସମ୍ମାନ କଥାବାର୍ତ୍ତାରେ । ଆମ ପନୀକୁ ଟିକେ ଆପଣ ବୁଝେଇ ଦେବେ କି ବେଶି ଅଭଦ୍ରାମୀ ଯେମିତି ନ କରେ । ଯାହା ପଚାରିବେ --- ଠିକ ଉତ୍ତର ମାପି ଚୁପି କହିବ ଯେମିତି । 

ଆଜିକାଲିକା ଫେସବୁକ୍ - ଟୁଇଟର - ହ୍ଵାଟ୍ସଆପ ଯୁଗର ଝିଅ ମାନେ କାହା କଥାକୁ ଖାତିର କରୁଛନ୍ତି କି ? ଚବିଶ ଘଣ୍ଟିଆ ସୋସିଆଲ ମିଡିଆରେ ବ୍ୟସ୍ତ ବିବ୍ରତ । ମାତ୍ର ତାଙ୍କ ପାଇଁ ଏହା ଚଳିବନି କାରଣ ସେମାନେ ସୁଶୀଳା - କ୍ଷମାଶୀଳା- ରକ୍ଷଣାଶୀଳା ଗୁଣବତୀ- ମୌନାବତୀ- ଲାବଣ୍ୟବତୀ ଝିଅ ଖୋଜୁଛନ୍ତି । କେଉଁ ଜିରେ। ସାଇଜର ପାଉଡର କ୍ରିମମଖା ଚଳଚିତ୍ର ନାୟିକା ନୁହେଁ ? ତେଣୁ ଆମ ପନୀକୁ ବୁଝେଇ ଦେବେ -- ଏମିତି ଲକ୍ଷେରେ ଗୋଟେ ପୁଅ ତା' ପାଇଁ ତା' ଦୁଆରବନ୍ଧକୁ ଆସିଛି । ଆଉ ଯାହା ରହିଲା ପନୀର ଭାଗ୍ୟ ।

ପାଖାପାଖି ଏଗାରଟା ବେଳେ ବରପାତ୍ର ଶ୍ରୀମାନ ପରମେଶ୍ଵର ବିଶ୍ୱାଳ ନିଜ ବାପା ଘନଶ୍ଵାମ ବିଶ୍ଵାଳ ଓ କକା ଶ୍ୟାମଘନ ବିଶ୍ଵାଳ ସହିତ ଟାଟା ଇଣ୍ଡିକାରୁ ଓହ୍ଲେଇଲେ । ଗୁରୁଜନଙ୍କ ପଛେ ପଛେ ଧିରେ ଧିରେ ଶାନ୍ତ ସୁଧିର ଭାବରେ ଆସୁଥିଲେ ପୁଅ । ମନେ ହେଉଥିଲା ପିଲାଟି ସଭ୍ୟ ଓ ଭଦ୍ର । 

ସମସ୍ତେ ଅତିଥି ଅଭ୍ୟାଗତଙ୍କ ସତ୍କାରରେ ଲାଗିଗଲେ । କଥାବର୍ତ୍ତାର ଲହର ଆରମ୍ଭ ହୋଇଗଲା ଦୁଇ ଘରର ମୁରବୀମାନଙ୍କ ମଧ୍ୟରେ । ପରମେଶ୍ଵରର କକା ଶ୍ୟାମଘନ ବାବୁ କାଜୁ ବରଫି ଖାଉ ଖାଉ କହି ଉଠିଲେ --- ବୁଝିଲେ ବେହେରା ବାବୁ ! ଆମ ପରମେଶ୍ଵର ପରା ଆମ ଘର ଆମ ଗାଁର ରାମାୟଣର ଦଶରଥ ନନ୍ଦନ ରାମଚନ୍ଦ୍ର ପରିକା ପୁଅ ଖାଣ୍ଟି ଚବିଶ କ୍ୟାରୋଟ ଗିନି ସୁନାମୁଣ୍ଡା । କେତେ ବିବାହ ପ୍ରସ୍ତାବ ନିତି ଆସୁଛି କହି ହେବନି କି ଗଣି ହେବିନି । ଗୁନା ବାବୁ ତ ଆମ ପରିବାରର ନୁହଁ ଆମ ସାହିର ଅତି ପ୍ରୀୟ ବଂଧୁବତ୍ସଳ ଭଦ୍ରଲୋକ । ତେଣୁ ତାଙ୍କ ଭରସାରେ ସଂସ୍କାରୀ ସୁଶୀଳା ରକ୍ଷଣଶୀଳା ପ୍ରସ୍ତାବ ପାଇଁ ଆସିଲେ ଆମେ | ପୁତୁରା ପରମେଶ୍ଵର ତ ଆସିବାକୁ ମନା କରୁଥିଲା ପ୍ରଥମରୁ । କେତେ ବୁଝେଇ ସୁଝେଇ ଆଣିବାକୁ ପଡିଲା ।

ଜାଣିଲେ ପିନାକୀ ଭାଇ ! ଆମେ ନିଜ ପୁତୁରାର ଗୁଣ ବଖାଣିବା ପୁଣି ନିଜ ମୁଁହରେ ଆଦୌ ସମୀଚୀନ ନୁହଁ । କିନ୍ତୁ କହି ଦେଉଛି ଗୁନା ବାବୁ -- ଏ ଖଣ୍ଡ ମଣ୍ଡଳରେ ପରମେଶ୍ଵର ପରି ସାଧା ସିଧା ସରଳ ସଫଟୱ୍ୱାର ଇଂଜିନିୟର ବିରଳ, ଟର୍ଚ୍ଚ ବା ଏମାର ଜେନସି ଲାଇଟ୍ ମାରି ଖୋଜିଲେ ବି ମିଳିବନି ? ମାସକୁ ୮୦ ହଜାର ଟଙ୍କା ନଗଦ ଦରମା -- ଶୀତତାପ ନିୟନ୍ତ୍ରୀତ ଫ୍ଲାଟ ନବରତ୍ନ ବହୁ ବିଦେଶୀୟ କଂପାନୀ ତରଫରୁ ପୁନେ ସହରରେ । ଆହୁରି ଡିଏ, ଏସଡିଏ, ଏଚଆରଏ, ମେଡିକାଲ, ଏଲଟିସି ଇତ୍ୟାଦି କେତେ କ'ଣ ସପ୍ତମ ବେତନ କମିଶନ ଆଧାରରେ । 

ଏ ସବୁ ଶୁଣି ଘନଶ୍ୟାମ ବିଶ୍ଵାଳ ବାବୁ ମନ୍ଦ ମନ୍ଦ ସ୍ମିତହାସ୍ୟ କରୁଥିଲେ ଆଉ ଘରର ବିହଙ୍ଗାଵଲୋକନ କରୁଥିଲେ ଅଙ୍ଗଦ ଲଙ୍କାପୁରୀ ଦର୍ଶନ କରିବା ପରି । କହିଲେ --- ହଉ ହେଲା ବେହେରା ବାହୁ । ଝିଅକୁ ଆଣନ୍ତୁ । ବହୁତ କଥା ହେଲା ।

ପନୀ ଆମର ନାଲି କୁମ୍ଭପକା ସମ୍ବଲପୁରୀ ପାଟଶାଢୀରେ ଲାଲ ଟୁକୁ ଟୁକୁ ଲାଲ ପରୀ କଣ୍ଢେଇ ପରି ବହୁତ ସୁନ୍ଦର ଲାଗୁଥିଲା । କାରଣ ଆଜି ତା ଭବିଷ୍ୟତ ସହିତ ଫରସଲା ହେବାର ଥିଲା । 

ପରମେଶ୍ଵରକୁ ପଙ୍କଜିନୀ ଜଣେ ସାଧା ସିଧା ମଫସଲିଆ ଗାଉଁଲୀ ଝିଅ ଭଳିଆ ଲାଗିଲା । ଏ କଥା ପରମେଶ୍ଵର ନିଜ କକାର କାନରେ ଚୁପ୍ ଚୁପ୍ କହିବାରୁ ଶ୍ୟାମଘନ ବାବୁ ତା' ଜଙ୍ଘକୁ ଟିକେ ଚିମୁଟି ଦେଲେ । କକା କହିଲେ -- ସଂଯମ କର । ପାଟି ବହୁତ ବଡ଼ । ମାଲ ମିଳିବ ହତେ ।

ପନୀ ସମସ୍ତଙ୍କୁ ସ୍ମିତହାସ୍ୟର ତାଳେ ତାଳେ ମୁଷ୍ଟିବଦ୍ଧ ନମସ୍କାର କଲା ଆଉ ଫୁଲ ପରି ଫୁଟିବା ମୁଦ୍ରାରେ ବାପାଙ୍କ ପାଖ ଚୌକିରେ ଧିରେ ଅତି ସନ୍ତର୍ପଣରେ ବସି ପଡିଲା ମୁଁହପୋତି ।

ଘନଶ୍ୟାମ ବାବୁଙ୍କୁ ଝିଅ ପଙ୍କଜିନୀ ପସନ୍ଦ ହେଲା । ଛାତି ପକେଟରୁ ନାଲି ଦୁଇ ହଜାରିଆ ନୂଆ କରକରିଆ ନୋଟ ଖଣ୍ଡେ ବାହାର କଲେ ଓ ଝିଅ ହାତରେ ଧରେଇ ଦେଲେ । କୁନ୍ଥ କୁନ୍ଥ ଝିଅ ପନୀ ବାପା ବେହେରା ବାବୁଙ୍କ ଇସାରାରେ ନେଲା ସରାଗରେ ।

ହଉ ବେହେରା ବାବୁ ! ଏଥର ନେବା ଦେବା କଥା ହେଲେ ଭଲ ହୁଅନ୍ତା । ନାଁ କ'ଣ କହୁଛନ୍ତି ଆପଣ ମାନେ ।

ଝିଅ ଆମର ପସନ୍ଦ ହେଲା । ଆପଣଙ୍କ ଅଳିଅଳି ଝିଅ ଆମ ବିଶ୍ଵାଳ ଘରର ବୋହୁ ହେଲା ଜାଣ ଗୁନା ବାବୁ । ଆମର ଯୌତୁକ ବାବଦରେ ସେମିତି କିଛି କହିବାର ନାହିଁ । ଦଶ ଲକ୍ଷ ବାଟଖର୍ଚ୍ଚ ପାଇଁ ଦେଲେ ଚଳେଇ ନିଅନ୍ତେ । ମାରୁତି ଅଲଟୁ ଦେଲେ ଭଲ ହୁଅନ୍ତା । ଗହଣା, ଆସବାପତ୍ର, ଠାଆସଜ, ଜୁହାରିଲୁଗା ଇତ୍ୟାଦି ଆପଣମାନେ ଆପଣଙ୍କର ଝିଅ- ଜ୍ଵାଇଁକୁ ଯାହା ଦେବେ ତା' ଉପରେ କିଛି କହିବାର ନାହିଁ ।

ଦଶଲକ୍ଷ ଯୌତୁକ ଶୁଣି ବେହେରା ବାବୁ ଟିକିଏ ବିଚଳିତ ହୋଇ ପଡିଲେ । କଣ୍ଠା ଶୁଖିଲା ଶୁଖିଲା ମନେ ହେଲା । ଝିଅ ପନୀକୁ ପାଠଶାଠ ପଢ଼େଇ ପୋଷ୍ଟ ଗ୍ରାଜୁଏଟ୍ ଇତିହାସରେ କରେଇଛନ୍ତି ବାଣୀବିହାରରୁ । ସଭ୍ୟତା ସଂସ୍କାର ସଣ୍ଠଣା ଯାବତୀୟ ଘରକରଣା ଝିଅକୁ ପାରୁପର୍ଯ୍ୟନ୍ତ ଶିଖେଇଛନ୍ତି । ପରମେଶ୍ଵର ଉଚ୍ଚ ଶିକ୍ଷିତ ଉଚ୍ଚ ପଦବୀରେ ଅଧିଷ୍ଠିତ ପୁଅ କିନ୍ତୁ ଆମ ପନୀ ବି କୋଉ ଗୁଣରେ କମ ନୁହଁ ? ସେ ବି ଫକୀରମୋହନ ବିଶ୍ଵବିଦ୍ୟାଳୟରେ ଇତିହାସ ସମ୍ମାନରେ ଶ୍ରେଷ୍ଠ ସ୍ନାତକ ଥିଲା । ଉତ୍କଳ ବିଶ୍ଵବିଦ୍ୟାଲୟରେ ଇଉଜିସି ନେଟ ପରୀକ୍ଷାରେ ଜେଆରଏଫ୍ ଇତିହାସରେ ପାଇଛି ସର୍ବ ଭାରତୀୟ ଚୟନ ସ୍ତରରେ । 

ଗୁନା ବାଦା ମାନିନେବାକୁ ଇଙ୍ଗିତ ଦେଉଥିଲେ, ଆଖିରେ ଆଖିରେ ବଡ଼ ଭାଇଙ୍କୁ ପ୍ରସ୍ତାବରେ ରାଜି ହେବାକୁ ଇସାରା ପରେ ଇସାରା ଦେଇ ଚାଲିଥିଲେ ।

ଘନଶ୍ଵାମ ବାବୁ ବେହେରା ବାହୁଙ୍କ ବିବଶତା ବୁଝି ଗଲେ ଯେମିତି ଲଫାପା ହାତରେ ଧରି ଭିତରେ କ'ଣ ଅଛି ଜାଣିବା ନ୍ୟାୟରେ । କଥାକୁ ଆଉ ଟିକେ ଗମ୍ଭିରତା ଦେବା ଆଳରେ କହିଲେ ହସି ହସି -- ଆମ ପରମେଶ୍ଵର ଭଳିଆ ବରପାତ୍ର ପରାର୍ଦ୍ଦେରେ ଗୋଟିଏ । ଏକଦମ ଶାନ୍ତ ପ୍ରଶାନ୍ତ ସୌମ୍ୟକାନ୍ତ ବପୁବନ୍ତ । କିଛି ନିଶା ପାଣି ନାହିଁ ଆଜି କାଲିକା ଉଚ୍ଛ୍ରଙ୍ଖଳ ଉଦ୍ଭ୍ରାନ୍ତ ବାଲୁଙ୍ଗା ଟୋକା ମାନଙ୍କ ପରି । ପୂରା ପିତୃଭକ୍ତ ମାତୃଭକ୍ତ ଆଚାର-ବିଚାର-ସଂସ୍କାର- ଭକ୍ତ ଓ ସର୍ବୋପରି ସଚ୍ଚା ଦେଶମାତୃକାର ପରମ ଦେଶପ୍ରେମୀ ଦେଶଭକ୍ତ ଆମ ସୁନା ପୁଅ ପରମେଶ୍ଵର । ଏମିତିକା ଜ୍ୱାଇଁ ଦଶ ଲକ୍ଷରେ ଏତେ କମ ଦାମରେ ମିଳିବା କଷ୍ଟକର । ନା କ'ଣ କହୁଛନ୍ତି ଗୁନା ବାବୁ। ବଡ଼ ଭାଇଙ୍କୁ ଭଲ କରି ବୁଝେଇ ଦେବେ ସମଝେଇ ତେବେ । ବୁଝିଲେଟି !

ଅସହାୟ ବେହେରା ବାବୁ ଧର୍ମପତ୍ନୀ ପଦ୍ମଜାଙ୍କ ମୁଁହକୁ ଥରେ ଆଉ ସାନ ଭାଇ ବାହାଘରର ମଧ୍ୟସ୍ଥ ଗୁନାର ମୁଖମଣ୍ଡଳକୁ ବାରି ବାରିକିରେ ଚାହୁଁଥିଲେ । ପରଖୁଥିଲେ କିଛି ଇଙ୍ଗିତ ମନ ମଗଜରେ ଭଠୁଥିବା ଅସହାୟତା ସହିତ ମିଶି ଯାଆନ୍ତା କାଳେ । ସାହସ ପାଇଯାଆନ୍ତେ ।

କିନ୍ତୁ ପରନ୍ତୁ ଅଧିକନ୍ତୁ କାହିଁ ? ସମସ୍ତେ ହଁ ମାରିବାକୁ ଠାରୁ ଥାନ୍ତି । କୂଳ କିନାରା ନ ପାଇ ପିନାକୀ ବେହେରା ବାବୁ ଜଣେ ଅସହାୟ ନିରୂପାୟ ବଢିଲା ଝିଅର ବାପ ହିସାବରେ ଦୋ-ଛକିରେ । ଅଗତ୍ୟା ହଁ ଭରିବାକୁ ଯାଉଥିଲେ । ଝିଅ ପନୀ ତାଙ୍କ ହାତକୁ ଟିକେ ଚାପି ଦେଲା ଦବେଇ ଦେଲା ।

ହସି ହସି କହିଲା --- ଅଙ୍କଲ୍ ! ଆପଣଙ୍କ ପୁଅର ଶୁଭନାମ କହିବେ କି ?

ଅଚାନକ ଏମିତି ଏକ ଅଖାଡୁଆ ପ୍ରଶ୍ନରେ ସମସ୍ତେ ହତବାକ୍ ଆଶ୍ଚର୍ଯ୍ୟ ଚକିତ । 

ଘନଶ୍ୟାମ ବାବୁ ସଗର୍ବେ କହିଲେ--- ଶ୍ରୀମାନ୍ ଆଯୁଷ୍ମାନ ପରମେଶ୍ଵର ବିଶ୍ୱାଳ ।

ପନୀ ଗୋଟିଏ ମିନିଟ କହି ନିଜ ମୋବାଇଲ ବାହାର କଲା । କିଛି ଗୋଟେ ଟାଇପ କଲା ଆଉ ମୋବାଇଲରେ ଦେଖି ଦେଖି କହିଲା --- ପରମେଶ୍ଵର ବିଶ୍ଵାଳ -- ଗୁଡ୍ଡୁ -- ଫେସବୁକରେ । ଦେଖନ୍ତୁ ଆପଣମାନେ -- ୧୦ ଫଟୋରେ ବିୟର ବାରରେ ମସ୍ତି, ୫ ଫଟୋରେ ମହାଶୟ ସାଂଗ ସହିତ ମଦ ପିଉଥିବାର ଦୋସ୍ତି । ଆହୁରି ଦେଖନ୍ତୁ ! ସିଗାରେଟ୍ ପିଇବାର ଏ ଫଟୋଯୁଗ୍ମକୁ । କୁହନ୍ତୁ ! ଆପଣଙ୍କ ସଂସ୍କାରୀ ପୁଅ କେମିତି ସିଗାରେଟ ଧୁଆଁର କୁଣ୍ଡଳୀ ତିଆରି କରି ଧୁମ୍ର ବଳୟର କୁହୁଡି ଆସ୍ତରଣ ଭିତରେ ହଜି ଯାଇଛି । ଆହୁରି ଦେଖନ୍ତୁ ! ଆପଣଙ୍କ ଏକୋଇର ବଳା ସୌମ୍ୟକାନ୍ତ ବସୁବନ୍ତ ବିଶିକେଶନଙ୍କୁ : ତିନି ଚାରି ଜଣ ଗୌରାଙ୍ଗୀ ହେମାଙ୍ଗୀ ଝିଅମାନଙ୍କ କମରରେ ହାତ ଦେଇ ଯେମିତି ଠିଆ ହୋଇଛି ରଙ୍ଗିଲା ଭଙ୍ଗିରେ -- ଝିଅମାନେ ତ ଭଉଣୀ କେବେ ହୋଇ ନ ଥିବେ ?

କ୍ଷମା କରିଦେବେ ମୋତେ । ଏତେ ଗୁଣରେ ମଣ୍ଡିତ ସଜ୍ଜିତ ବିଭୂଷିତ ଆପଣଙ୍କର ଗୁଣବାନ ଆୟୁସ୍ନାନ ପୁତ୍ର ମଣୀଙ୍କ ପାଇଁ ମୁଁ ଆଦୌ ଉପଯୁକ୍ତ। ଗୁଣମୁକ୍ତା ନୁହେଁ ।

ଝିଅ ପନୀର ଏମିତି ଶାଣିତ ଆଉ ସଠିକ ରୋକଠୋକ ସ୍ପଷ୍ଟ କଥା- ଭାଷଣ - ସମ୍ଭାଷଣ ଶୁଣି ସମସ୍ତେ ଆଚମ୍ବିତ ନିୟନବିସ୍ଫାରିତ ବାକଶୂନ୍ୟ ଶବ୍ଦସାରଶୂନ୍ୟ ହତବମ୍ବ ବିପ୍ରଲମ୍ବ । ବେହେରା ବାବୁ ରାଗରେ ଅଗ୍ନିଶର୍ମ। ପାଲଟିଗଲେଣି ସେତେ ବେଳକୁ । ଆଉ ଲାଗୁଥିଲା ଅଧୁନା ଗୁନା ଦାବାଙ୍କୁ କଞ୍ଚା ଚୋବାଇ ଯିବେ ।

ଘନଶ୍ୟାମ ବିଶ୍ଵାଳ ବାବୁଙ୍କୁ ଲକ୍ଷ୍ୟ କରି ବେହେରା ବାବୁ ରାଗ ଗରଗର ଢଙ୍ଗରେ କହି ପକେଇଲେ --- ବୁଝିଲେ ବିଶ୍ୱାଳ ବାବୁ ! ଆପଣ ଏଆଡ଼ୁ ସେଆଡୁ ଅଗଡମ ବଗଡମ କହି ଆମକୁ ଠକି ଦେବେ ବୋଲି ଭାବି ଆସିଥିଲେ ସଂଵନ୍ଧ ବାନ୍ଧିବାକୁ କିନ୍ତୁ ଆମ ଝିଅକୁ ଠକି ପାରିବେନି କାରଣ ଆମ ପଙ୍କଜିନୀ ଫେସବୁକ୍ ରେ ଅଛି ।

ଶୁଣ ଶୁଣ ସୁଧୂଜନେ ! ସୋସିଆଲ ମେଡିଆ ଘାଣ୍ଟିଲେ ସବୁବେଳେ ଖରାପ ହୁଏ ନି । ସବୁବେଳେ ଫେସବୁକ୍‌- ଟୁଇଟର ଇତ୍ୟାଦିରେ ବୁଡି ରହିଲେ ନକାରାତ୍ମକ ଗୁଣରେ ଗରୀୟାନ ଚୁପ୍ ସଇତାନ ମାନଙ୍କ ଭଦ୍ରମୁଖାକୁ ସକାର।ମୂକ ଚିନ୍ତା-ଚେତନା ଦ୍ଵାରା ଧରି ହୁଏ ଖୋଲି ଦେଇ ହୁଏ

ଆରେ ଗୁନା ! ମୁହଁ ଖଟ୍ଟା କରି ଦେଲୁ ରେ । ଏମିତିକା ପ୍ରସ୍ତାବ ଆଣିବୁନି କେବେ । 

ବେହେରା ବାବୁ ଦେଖିଲେ ଶର୍ମଶାର ଗୁନା- ଶାନ୍ତା ଯୋଡି ଓ ମୁଁହ ତଳକୁ କରି ବିଶ୍ଵାଳ ଫଉଜ କେମିତି ଲାଙ୍ଗୁଡ଼ ଯାକି ଛତ୍ରଭଙ୍ଗ ଦେଉଥିବାର ଦୃଶ୍ୟ ।

ସ୍ନେହିଳ ହାତକୁ ଝିଅ ପନୀର ମଥାରେ ସରାଗରେ ବୁଲେଇ ଆଣୁ ଆଣୁ ମନେ ମନେ ଭାବୁଥିଲେ ବଂଶୀୟାନ ବେହେରା ବଂଶର ମାନ ସମ୍ମାନ ମହତ ଇଜ୍ଜତ ବଂଚେଇ ଦେଲା ଆମ ଘର ମୂରୁଜ ପିନାକୀ-ପଦ୍ମଜା ଆତ୍ମଜା ସୁନାଝିଅ ପନୀ ପଙ୍କଜିନୀ ରଜ ।



Rate this content
Log in

More oriya story from Panchanan Jena

Similar oriya story from Inspirational