ଯଦ୍ୟପି

ବିକାଶ ଯଦ୍ୟପି  ବିନାଶ ସାଜିବ

  ସ୍ୱାଧୀନତା ମୂଲ୍ୟ ନାହିଁ ।

ବିକାର ଯଦ୍ୟପି ସ୍ବୀକାର ହୋଇବ

  ଜୀବନର ମୂଲ୍ୟ କାହିଁ ।।

ଆହାର ଯଦ୍ୟପି ପ୍ରହାର ସାଜିବ

   ଜୀବନ ପାଇବୁ କାହିଁ ।

ବିଚାର ଯଦ୍ୟପି  ଶିକାର ସାଜିବ

  ପ୍ରାଣ କି ଉଠିବ ଚେଇଁ ।।

ସୁଗମ ଯଦ୍ୟପି   ଅଗମ ସାଜିବ

   ବାଟ ହଜିବ କି ନାହିଁ ।

କଲମ ଯଦ୍ୟପି   ମଳମ ସାଜିବ

   କ୍ରାନ୍ତି ପଡ଼ିବଟି ଶୋଇ ।।

ଧରମଟା ଯଦି   ସରମ ଲାଗିବ

   ଭଗବାନ ଯିବେ କାହିଁ ।

ମରମଟା ଯଦି   କରମ ଜାଳିବ

   ଶାନ୍ତିକୁ ଖୋଜିବୁ କାହିଁ ।।

ରକ୍ଷକ ଯଦ୍ୟପି   ଭକ୍ଷକ ସାଜିବ

   ବିଶ୍ୱାସ ଯିବରେ ତେଜି ।

ପ୍ରତ୍ୟକ୍ଷ ଯଦିରେ ପରୋକ୍ଷ ସାଜିବ

   ସମ୍ପର୍କ ଯିବରେ ଭାଜି ।।