ଉତ୍କଳ ଗୌରବ
ଉତ୍କଳ ଗୌରବ
ତୁମ ଲାଗି ଆମେ ଓଡ଼ିଆ ବୋଲାଇ
ଗରବ କରୁଛୁ ଆଜି
ହେ ମଧୁସୂଦନ ତୁମର ସେ ଋଣ
ପାରିବୁନି ଆମେ ସୁଝି...
ସାତ ଦରିଆର ସେପରିକୁ ଯାଇ
ବାରିଷ୍ଟରୀ ଶିକ୍ଷା ନେଲ
ସତ୍ୟଭାମାପୁର ପଲ୍ଲୀ ମଫସଲ
ଗାଆଁକୁ ତ ଧନ୍ୟ କଲ ।
ଆଇନକୁ ସିନା ପେଷା କଲ ତୁମେ
ଭାଷା ପାଇଁ କଲ ରଣ
ସ୍ୱତନ୍ତ୍ର ଓଡିଶା ପ୍ରଦେଶ ଗଠନେ
ଢାଳିଦେଲ ମନ ପ୍ରାଣ ।
ପ୍ରତି ଓଡ଼ିଆର କାନରେ କହିଲ
ଉଠରେ ଉଠରେ ଭାଇ
ହତଶିରୀ ଆମ ମାଆର ଆଖିରୁ
ଲୁହ ପୋଛି ଦେବାପାଇ ।
ଏ ଜାତିର ଚାରୁ କାରୁକଳା ସବୁ
ଯାଇଥାନ୍ତା ଦିନେ ମରି
ଦରିଆ ସେପାରେ ତୁମପାଇଁ ସିନା
ତା ଆଦର ଗଲା ଭରି ।
ମାଆ ମାଆ ବୋଲି କେତେଯେ ଖୋଜିଲ
ମାଆକୁ ପାଇଲ ନାହିଁ
ମାଆ ଯେତେବେଳେ ସ୍ୱତନ୍ତ୍ର ହୋଇଲା
ତୁମେ ପଡିଥିଲ ଶୋଇ।
ତୁମ ବିନା ଆମେ ଇତିହାସ ବୁକେ
ଯାଇଥାନ୍ତୁ ଦିନେ ହଜି
ଉଠାଇଲ ତୁମେ ଓଡ଼ିଆ ଜାତିକୁ
ଜୀବନଟା ସାରା ଯୁଝି ।
ସ୍ୱତନ୍ତ୍ର ଓଡିଶା ଉତ୍କଳ ପ୍ରଦେଶ
ସ୍ୱତନ୍ତ୍ର ଓଡ଼ିଆ ଭାଷା
ଉତ୍କଳ ଗୌରବ ତୁମେ ଦେଖାଇଲ
ଏ ଜାତିକୁ ନୂଆ ଦିଶା ।
ଭାଷା ଭିତ୍ତିରେ ତ ସ୍ୱତନ୍ତ୍ର ଓଡିଶା
ରାଇଜ ଗଠନ ହେଲା
ଓଡ଼ିଆମାନଙ୍କୁ ସାରାଦୁନିଆରେ
ନୂଆ ପରିଚୟ ଦେଲା ।