ତୁମେ ଆଉ ତୁମେ ହୋଇନାହଁ

ବହୁଦିନ ପରେ ଦେଖା ହେଲା ଯେବେ

     ଚିହ୍ନି ପାରିଲନି ତୁମେ ତ ମୋତେ,

ପାଖକୁ ଯିବାରୁ ଦୋ ଦୋ ଚିହ୍ନା ହେଲ

     ମନେ ନାହିଁ କିଛି ଯେମିତି ସତେ |

ସବୁ କଥା ମୋର ମନେ ତ ରହିଛି

     ସେମିତି ବି ସ୍ନେହ ହୃଦୟେ ଅଛି,

ଭୁଲି କି ପାରିଛି କେହି କା' ଜୀବନେ

     ପ୍ରଥମ ପ୍ରେମର ସବୁଜ ସ୍ମୃତି |

ତୁମ ବ୍ୟବହାର ଅଲଗା ଲାଗିଲା

   ଭେଟ ହେଲା ଯେବେ ଅପ୍ରତ୍ୟାଶିତ,

ତୁମେ ଆଉ ତୁମେ ହୋଇନାହଁ ରହି

    ଯେମିତି କି ମୋତେ ଭୁଲିଯାଇଛ !

ସେତେବେଳେ ତୁମେ ଘଣ୍ଟା ଘଣ୍ଟା ଧରି

    ପ୍ରତୀକ୍ଷାରେ ରୁହ ଭେଟିବା ପାଇଁ,

ଚିହ୍ନିଲ ଏବେ ତ ତଥାପି ଲାଗୁଛି

    ମୋ ପାଇଁ ତୁମର ସମୟ ନାହିଁ |

କହିଥିଲ ମୋତେ ଭୁଲିବନି କେବେ

    ଜୀବନେ ନିଶ୍ୱାସ ଥିବା ପର୍ଯ୍ୟନ୍ତ,

 ଆମରି ସଂସାରେ ପ୍ରୀତି ଝରୁଥିବ

    ଲେଉଟିବ ନାହିଁ ମଧୁ ବସନ୍ତ |

ପ୍ରତିଶୃତି ତୁମେ ଭୁଲିଗଲ ସିନା

     ଏମିତି କାହିଁକି କଲ ଜାଣେନା,

ତଥାପି ଏଯାଏ ବଦଳିନି ମୁଁ ଯେ

     ଏକାକୀ ବଞ୍ଚିବି ଭୁଲି ପାରେନା |

ଭାଗ୍ୟେ ସୁଖ ମୋର ଲେଖାନାହିଁ ବୋଧେ

     ସେଥିପାଇଁ ତୁମେ ବଦଳିଗଲ,

ତୁମେ କିନ୍ତୁ ମୋର ଜୀବନେ ଅଭୁଲା

     ଝରା ବସନ୍ତର ସ୍ମୃତି ଅଶ୍ରୁଳ |