ଟିକି ଭକତ

ଆମେ ଟିକି ଶିଶୁ ଟିକି ଭକତ

ଭଜୁଛୁ ଭଜନ ଶୁଣ ଆରତ ।

ଦୁଃଖ ଶୋକ ତାପ ପ୍ରବାହ ଭୀତି

ହରି ନିଅ ପ୍ରଭୁ ଦିଅ ସୁଗତି ।

ଗୁହାରୀ କରୁଛୁ ତୁମ୍ଭ ପୟରେ

ଆରତ ନାଶନ , ତୁମ୍ଭ ସେବାରେ ।

ବିତି ଯାଉ ଆମ୍ଭ ଏଇ ଜୀବନ

ଟିକି ଭକତ ଙ୍କ ଗୁହାରୀ ଶୁଣ ।

ଅନ୍ତରରେ ଭରି ଭକତି ଭାବ

ସେବୁଛୁ ପୟରେ ହେ , ଗୁରୁ ଦେବ ।

କରୁଣା ଆଶିଷ ବରଷି ଦିଅ

ଆହେ ମହା ପ୍ରଭୁ ହେ ଦୟାମୟ ।

ଟିକି ହାତେ ଧୂପ ଦୀପ ଉଠାଇ

ଦେଉ ଅଛୁ ପ୍ରଭୁ ଆମେ ବନ୍ଦାଇ ।

ଫୁଲ ଫଳ ଭୋଗ କରି ଅର୍ପଣ

ଭକତ ବତ୍ସଳ କର ଗ୍ରହଣ ।

ଦିଅ ଭକ୍ତି ଭାବ ଅନ୍ତରେ ଭରି

କରୁଛୁ ନିକଟେ ଆମ୍ଭେ ଗୁହାରୀ ।

ଦିଅ ବିପଦେ ସାହସ ଶକତି

ସତ୍ୟ , ଧର୍ମ , ନ୍ୟାୟେ ରଖାଅ ମତି ।

ଦିଅ ବିଦ୍ୟା ବୁଦ୍ଧି , ଶୁଭ ଆଶିଷ 

ଜୀବନେ ହୋଇବା ଭଲ ମଣିଷ ।

ଭବିଷ୍ୟ ଜୀବନେ ହସ ଖୁସିରେ

ଯଶ ରଖି ଯିବା ଏଇ ମହୀରେ ।