ତମେ ଆସିବ ବୋଲି

ତମେ ଆସିବ ବୋଲି

ଶ୍ରାବଣର ସଜଳ ଆକାଶେ ଭିଜିଲେଣି

କୁନିକୁନି ଚିକିମିକି ତାରାଫୁଲ ,

ବାଦଲର ଆଢୁଆଳେ ମୁରୁକି ହସୁଛି

ପୁନେଇଁର ତୋଫା ଜହ୍ନ ,

ଚେନା ଚେନା ଜ୍ୟୋସ୍ନାର ସ୍ପର୍ଶରେ

ହସିଲାଣି ଦୂର ଶାଳବଣ

ନଈ, ନାଳ ,ସବୁଜ ଗାଲିଚା ,

ଦୂର ଦିଗ୍‌ବଳୟୁ ନଇଁ ନଇଁ ଆସିଲାଣି

ସ୍ନିଗ୍ଧ ସିକ୍ତ ସମୀରଣ

ଆଉ ଛୁଇଁଲାଣି ଧରିତ୍ରୀର ଆରକ୍ତ କପାଳ ,

ରଜନୀଗନ୍ଧାର ମହମହ ମହକରେ

ପୁଲକିତ ପ୍ରୀତିଗନ୍ଧା ନିରୋଳା ମୁହୂର୍ତ୍ତ  ।

ରୋମାଞ୍ଚିତ ମନ ମୋର 

ଖୋଜିଲାଣି ଶୀତଳ ସାନିଧ୍ୟ ,

କ୍ଳାନ୍ତ ଦେହ ଓ ପ୍ରାଣ

ହଜିଥିବା ଦିନ

ହଜିଥିବା ପୁରୁଣା ସପନ

ଫେରିଲେଣି ପର ଝାଡିଝାଡି ,

ହାତଠାରି ଡାକିଲେଣି ନଈପଠା

ଅସୁମାରି ମହୁଲଫୁଲର ବଣ

ସତେଜ ହୋଇଉଠୁଛି ଏକାମ୍ର କାନନ  

ଶୁନଶାନ ନିଶବ୍ଦ ଜ୍ୟୋସ୍ନାଭିଜା ରାତିରେ ।

ରାତିର ନୀରବ ପ୍ରହରେ

ଶୁଭିଲାଣି ତମ ନୂପୁରର ଋଣୁଝୁଣୁ ଶବ୍ଦ 

ପ୍ରାଣବନ୍ତ ହେଲାଣି ମୋ ସର୍ବାଙ୍ଗ ନିର୍ଜୀବ ସତ୍ତା

ଆଂଜୁଳାଏ ତମ ମୁକୁଳା ହସରେ ,

ଚିତ୍ରଟିଏ ଅଙ୍କିତ ହେଲାଣି

ମୋ ରିକ୍ତ ହୃଦୟର ସୁପ୍ତ ତନ୍ତ୍ରୀରେ

ଆଉ ଖସିପଡିଲାଣି ବିଚିତ୍ର ବର୍ଣ୍ଣର 

ପେନ୍ଥା ପେନ୍ଥା ପ୍ରେମଫୁଲର ପାଖୁଡା

ଧରଣୀର ସିକ୍ତ ଅଞ୍ଚଳରେ ।

ଏକା ଏକା ଏତେବଡ ରାସ୍ତାରେ 

ପାଦ ମୁଁ ଥାପିଛି ଓଦା ଜୁଡୁବୁଡୁ

ତମର ସେ କେଉଁ ଏକ 

ଅନାବିଳ ପ୍ରେମର ଫଲ୍ଗରେ ,

ଭାସୁଛି ମୁଁ କୁଟାଖିଅଟିଏ 

ଖାସ୍ କେଉଁ ଏକ ମୁଗ୍ଧ ଅନ୍ବେଷଣରେ  ।।