ସୁନେଲୀ ରାକ୍ଷୀ

ଶ୍ରାବଣ ମାସର ପୁନେଇଁ ଆସିଲା

ଆଣିଛି ରାକ୍ଷୀ ପରବ ।

ଉଷତ ହେଲାଣି ଭଉଣୀର ମନ

ଭାଇକୁ ରାକ୍ଷୀ ବାନ୍ଧିବ ।୧।

ବାଛି ଆଣିଅଛି ସୁନେଲୀ ରାକ୍ଷୀଟି

ଦିଶୁଛି କେଡେ ଡଉଲ ।

ଭାଇ ହାତେ ନେଇ ରାକ୍ଷୀଟି ବାନ୍ଧିବ

ରାକ୍ଷୀ ତ ଅମୂଲ ମୂଲ ।୨।

ସଜାଡି ଆଣିଲା ଥାଳିଆରେ ରାକ୍ଷୀ

କୁସୁମ ଚନ୍ଦନ ଆଦି ।

ସିନ୍ଦୂର ଚାଉଳ ଘିଅଦୀପ ମିଠା

ସବୁ ଦରବ ସମ୍ପାଦି ।୩।

ଚନ୍ଦନ ସିନ୍ଦୁର ଟୀକା ଲଗାଇଲା

ଭାଇର ମଥାରେ ନେଇ ।

କୁସୁମ ଚାଉଳ ବେଗେ ନେଇଦେଲା

ସେ ଟୀକା ପରେ ଛୁଆଇଁ ।୪।

ସୁନେଲୀ ରାକ୍ଷୀଟି ଭାଇର ହାତରେ

ବାନ୍ଧିଲା ଭଉଣୀ ନେଇ ।

ବନ୍ଦାପନା କଲା ଦୀପଟିକୁ ଧରି

ମିଠାକୁ ଦେଲା ଖୁଆଇ ।୫।

ଭାଇ ହାତେ ତୋର ରାକ୍ଷୀଟି ବାନ୍ଧିଲି

ସୁରକ୍ଷା ପାଇଁକି ତୋର ।

ରାକ୍ଷୀ ଆମ ସାକ୍ଷୀ ରହିଲା ସୁରକ୍ଷା

ସଦା କରିବୁ ତୋ ମୋର ।୬।

ସୁନେଲୀ ରାକ୍ଷୀଟି ଭାଇ ଭଉଣୀଙ୍କ

ସେନେହ ପ୍ରୀତିର ଡୋର ।

ବରଷକେ ଥରେ ଆସଇ ତା ସ୍ମୃତି

ରହଇ ଚିର ଭାସ୍ୱର  ।୭।