ସୁବିଧା ଟିକସ
ସୁବିଧା ଟିକସ
ଦୈନନ୍ଦିନ କାର୍ଯ୍ଯକ୍ରମେ
ଆସିଯାଏ ଯଦି ବ୍ଯତିକ୍ରମ
ସୁବିଧା ଟିକସ ଭରି
ପଥ କର ସହଜ ସୁଗମ ॥
ସୁବିଧା ଟିକସ ପାଣ୍ଠି
ଜମା ହୁଏ ନାହିଁ ରାଜକୋଷେ
ସୁବିଧା ପ୍ରଦାନକାରୀ
ପାଣ୍ଠି ନେଇ ନିଜ ମନ ତୋଷେ ॥
ଯଦି କର ରେଳଯାତ୍ରା
ବସିବାକୁ ନାହିଁ ଆରକ୍ଷଣ
ସୁବିଧା ଟିକସ ବଳେ
ବର୍ଥ ଗୋଟେ ମିଳିଯିବ ଜାଣ ॥
କେଉଁ କାର୍ଯ୍ୟାଳୟେ ଯଦି
ଫାଟକରେ ଲାଗିଅଛି ତାଲା
ସୁବିଧା ଟିକସ ବଳେ
ଫାଟକଟି ହୋଇଯିବ ମେଲା ॥
ଡାକ୍ତର,ଚିକିତ୍ସାଳୟେ
ଲମ୍ବା ଧାଡି ଦେଖି ଯଦି ଡର
ସୁବିଧା ଟିକସ ଭରି
ପ୍ରଥମରେ ହୁଅ ଆଗଭର ॥
ଟଙ୍କା ପଚାଶ,ଶହେରେ
ଯେତେ ଯେତେ ଅସମ୍ଭବ କାମ
ଶିକ୍ଷାଠାରୁ ସ୍ବାସ୍ଥ୍ୟ ଯାଏ
ଅବା ହେଉ ବିଭିନ୍ନ ନିଗମ ॥
ଲାଞ୍ଚ,ଚୋରି,ବ୍ୟଭିଚାର
ପର୍ଯ୍ଯାୟରେ ନୁହେଁ ଇଏ ଗଣା
ନୁହେଁ ପି.ସି କାରବାର
ଦୁର୍ନୀତି ବି ନୁହେଁ ଏହା ଜଣା ॥
ଯେଣୁ ଏହା ସର୍ବବ୍ୟାପି
ସର୍ବଜନେ ଗ୍ରହଣୀୟ ବୋଲି
ନୁହେଁ ଏହା ଭ୍ରଷ୍ଟାଚାର
କହିଲେ ଦୋଷଟି ହେବ ଖାଲି ॥