ଇଉଜ୍ ଏଣ୍ତ୍ ଥ୍ରୋ

ଲେଖାଲେଖି ନେଇ କଲମଟେ ପାଇଁ

   ବଜାର ଚାଲିଲି ମାଡି

ଦୋକାନୀ ଭାଇ ତା କଲମ ପେଡିରୁ

    ଆଣିଲା ଚାରିଟା କାଢି

କଲମକୁ ଧରି ପଚାରିଲା ମୋତେ

   "କଅଣ କରନ୍ତି ଭାଇ"

ତୁମ ଲେଖାପଢା ଅଭ୍ୟାସକୁ ନେଇ

   କଲମ ଦେବି ଧରେଇ

ବିନମ୍ରେ କହିଲି ଲେଖକଟିଏ ମୁଁ

   ଲେଖିବାଟା ମୋର ନିଶା

ପେଶାରେ ବେତନଭୋଗୀ କର୍ମଚାରୀ

  ଚାକିରି ମୋର ବେଉସା

ଦାମୀ କଲମଟେ ମୋ ଆଗରେ ଥୋଇ

    କହିଲା ନିଅ ହେ ଭାଇ

ହେଇଥାଅ ଯଦି କ୍ରାନ୍ତିକାରୀ ତୁମେ

    ନାଲି କଲମଟି ସହି

ଲେଖୁଥାଅ ଯଦି ଅକାଳେ ସକାଳେ

    କଲମରେ କିଆଁ ଲୋଭ

ନେଇଯାଅ ଗୋଟେ ନେଳିଆ ରିଫିଲ୍ 

    ଲେଖିବାକୁ ବାଗ ହେବ

ନାଇଁ ଯଦି ତୁମେ ମୁଖପୁସ୍ତିକାରେ

   ଲେଖୁଅଛ ନୂଆନୂଆ

ଆଜିକାର ଲେଖା ଆସନ୍ତା କାଲିକୁ

   ପଚା ଗନ୍ଧ ଛାଡେ ଯାହା

ମୋତେ ଯାହା ଲାଗେ ନୂଆନୂଆ ତୁମେ

   ଲେଖାରେ କରୁଛ ଗ୍ରୋ

ତୁମ ଲେଖା ଭଳି କିଣି ନିଅ ଗୋଟେ

    ପୂରା ଇଉଜ୍ ଏଣ୍ତ ଥ୍ରୋ