ପ୍ରେମର ସନେଟ୍

ମୁଁ ତୁମକୁ ଭଲ ପାଏ,ତୁମେ ମୋତେ ଖୁବ ଭଲ ଲାଗ

ଶବ୍ଦାବଳୀ ସବୁ ଏବେ ପ୍ରକାଶ୍ୟରେ କହିବାକୁ ମନା

କହି କି ପାରିବ ମୋତେ କେଜାଣି କେମିତି ସତେ

ସଂକୀର୍ଣ୍ଣ, ସୀମିତ,ଘୃଣ୍ୟ ହେଇଗଲା ଆମର ଭାବନା ।

ଯଦି କେବେ ଅନୁରାଗେ କହିବାକୁ ଏଇ ମନେ ଜାଗେ

ଅଢେଇ ଅକ୍ଷର ଭାଷା କେହି ଜଣେ ଅନ୍ତରଙ୍ଗ ଭାବି

ପତ୍ନୀ,ପ୍ରେୟସୀ ଅଥବା ଭାବିପତି, ଭାବିପତ୍ନୀ

ବ୍ୟତିରକେ ଖୋଜିବାକୁ ଏ ମଣିଷ ହେଉଥାଏ ଭାବି ।

ସଖା, ବନ୍ଧୁ, ସହୋଦର, ଭାଇ,ଭଗ୍ନୀ,ପିତୃମାତୃ ତୁଲ୍ୟ

ଅଗଣିତ ମଣିଷଙ୍କୁ ଅନ୍ତରରେ ଭଲପାଏ ବୋଲି

ସମ୍ପର୍କ ନ ଯାଉ ତୁଟି ହେଉଯାଉ ପଛେ କଣ୍ଠରୋଧ

ସମ୍ମୁଖରେ ପାରିବିନି କହି ତୁମକୁ ମୁଁ ଭଲ ପାଏ ବୋଲି ।

ମୁଁ ତୁମକୁ ଭଲ ପାଏ ସଂଜ୍ଞା ଆଜି କାହିଁ ହୁଏ ସଙ୍କୁଚିତ 

କା ପାଇଁ ଅଶ୍ଳୀଳ ପୁଣି କାହା ପାଇଁ ଭାଷା ଅବାଞ୍ଛିତ ।