Library
ପତ୍ନୀ ଏକ୍ସଚେଞ୍ଜ୍ ଅଫର
ପତ୍ନୀ ଏକ୍ସଚେଞ୍ଜ୍ ଅଫର
ମହାପ୍ରଭୁ କହିଲେ ହେ ବତ୍ସ
ପତ୍ନୀ ସାଥେ ଯୁଝିଯୁଝି
ପଳାୟନପନ୍ଥୀ ସାଜି
ସବୁ ଦିନ ରହୁଅଛ କାହିଁକି ବିବଶ
ଆଜି ତୁମ ମନୋବାଞ୍ଛା କରିବି ମୁଁ ପୂର୍ଣ୍ଣ
ମାଗି ନିଅ ପତ୍ନୀ ଗୋଟେ
ଯେମିତି ଭାବିଛ ଚିତ୍ତେ
ବିଗତ ରାତିରେ ଦେଖିଥିବା ସପନ
ମାତ୍ର ଗୋଟେ ସର୍ତ୍ତାବଳୀ ଅଛି ତୁମ ଲାଗି
ପତ୍ନୀ ବଦଳେ ବାଡୁଅ
ଝିଅ ମାଗିବା ଅନ୍ୟାୟ
ପତ୍ନୀ ବଦଳରେ ପତ୍ନୀ ନିଅ ବର ମାଗି
ସପନରେ ଦେଖିଥିଲ ଯେମିତି ଘରଣୀ
ଅବା କେଉଁ ନିରିମାଖୀ
ଅଛି ତୁମ ମନଲାଖି
ଇଚ୍ଛାମତେ କରିନିଅ ତୁମ ଅର୍ଦ୍ଧାଙ୍ଗିନୀ
ଶର୍ମା ବାବୁଙ୍କ ଘରଣୀ ଅତି ଉଚ୍ଚମନା
ଝଗଡା ସେ ନ କରଇ
ପତିଙ୍କୁ ସଦା ଦେଖଇ
ଇଚ୍ଛା ଯଦି ନେଇଆସ ନ ହୋଇ ବିମନା
କହିଲି ପ୍ରଭୁଙ୍କୁ ଭଲ ଶର୍ମାଙ୍କ ଘରଣୀ
ମାତ୍ର ବଦଖର୍ଚ୍ଚୀ ସିଏ
ତାକୁ ସମ୍ଭାଳିବ କିଏ
ଅଳପ ବେତନେ ତାକୁ ପାରିବିନି ଜିଣି
ବର୍ମା ବାବୁଙ୍କ ଘରଣୀ କଥା ମନେ ଭାବ
ଅଳପେ ସନ୍ତୁଷ୍ଟ ସିଏ
କା'ମନେ ଦୁଃଖ ନଦିଏ
ଦେଖ... ଯଦି ନେଇ ଆଣି ଚଳେଇ ପାରିବ !
ବର୍ମା ବାବୁଙ୍କ ଘରଣୀ ନିଶ୍ଚେ ସୁଗୃହିଣୀ
କହିଲି ପ୍ରଭୁଙ୍କ କାନେ
ନିର୍ଘାତ କାଳୀ ମା ଯେହ୍ନେ
ତାକୁ ନେଇ ମୋ ସଂସାର ଚାଲି ପାରିବନି
ଦେବଦୂତ ଜାଣିପାରି ମୋ ମନ ବେଦନା
କହିଲେ ତୁମ୍ଭ ପଡୋଶୀ
ମୃଗନୟନୀ, ରୁପସୀ
ବୁଦ୍ଧିରେ, ବିଦ୍ୟାରେ ସର୍ବଗୁଣେ ପରିପୂର୍ଣ୍ଣା
ପତ୍ନୀ ରୂପେ ବାଛିନିଅ ସେହି ରୂପସୀଙ୍କୁ
ଶାନ୍ତିରେ ସହାବସ୍ଥାନ
ମନୋବାଞ୍ଛା କର ପୂର୍ଣ୍ଣ
ବଦଳରେ ତୁମ୍ଭ ପତ୍ନୀ ଦିଅ ପଡୋଶୀଙ୍କୁ
ପଡୋଶିନୀ ପାଇ ପ୍ରଭୁ ହେବି ନିଶ୍ଟେ ଖୁସି
ହେଲେ ମୋ ହୁଣ୍ତି ଘରଣୀ
ହେଇଯିବ ପାଗଳିନୀ
ଯଦି ନେଇ ଯିବ ସେହି ମଦୁଆ ପଡୋଶୀ
ଦରକାର ନାହିଁ ପ୍ରଭୁ ବଦଳ ବେପାର
ମୋ ପାଇଁ ମୋ ପତ୍ନୀ ଭଲ
ହୁଏ ପଛେ କଲବଲ
ପରୀକ୍ଷା ନିଅନା ଆଉ ଆହେ ନିରାକାର
