ସଫଳତା

ସପନ ମୋହରି ଗଗନକୁ ଛୁଏଁ ପାଇବାକୁ ଜହ୍ନ ତରା

ଯୋଜନା କରେ ମୁଁ ଯୋଜନ ଯୋଜନ ତଥାପି ମୁଁ ପଥହରା l

ସପନ ଦେଶରେ ସପନ କିଣଇ ସପନ ବିକଇ ମୁହିଁ

କେତେ ଲାଭ କରେ କେତେ କ୍ଷତି କରେ ହିସାବ ତା ଜାଣିନାହିଁ l

ଆକାଶର ତାରା ଆଣିବାକୁ ପରା ସପନର ଜାଲ ବୁଣେ

ସେ ଜାଲ ଭିତରେ ନିଜେ ଛନ୍ଦି ହୋଇ ଅଗୁଣକୁ ମୋର ଭଣେ l

କାଗଜ ଜାହାଜ ଉଡାଇ ଆକାଶେ ଛୁଇଁବାକୁ ଚାହେଁ ନଭ

ଯୋଜନାକୁ ମୋର ଅସଜଡା କରି ବୃଥା କାଢୁଥାଏ ଦମ୍ଭ।

ଅସମ୍ଭବ ବୋଲି ବୀର ଜାତକରେ ନଥାଏ କେବେ ବି କିଛି

କରିବାକୁ କିନ୍ତୁ ଇଚ୍ଛାକୁ ସମ୍ଭବ ଆଳସ୍ୟକୁ ଦେବା ପୋଛି l

ଯୋଜନାରେ ରଖି ସମ୍ଭାବନା ମତି କାର୍ଯ୍ୟରେ ହେଲେ ତତ୍ପର

ବେଳ ଥାଉ ଥାଉ ବନ୍ଧ ବାନ୍ଧିଥିଲେ ରହେନା ବନ୍ୟାର ଡର।

ଜହ୍ନ ନହେଲେବି ତାରା ନ ହେଲେବି ମୁଠାଏ ଆକାଶ ଆସେ

କର୍ମଯୋଗୀ ନର ପାଏ ସଫଳତା ମୁଖ ଝଲସାଇ ହସେ।