(ସନେଟ ସୁଧା ୧)ହସିଉଠୁ ଏ ସଂସାର

ହେ ଭୋଳା ଶଙ୍କର ପ୍ରଭୁ ମହେଶ୍ବର ଆଦିଯୋଗୀ କାଳେଶ୍ୱର

ତୁମେ ସତ୍ୟ ଶିବ ତୁମେ ହିଁ ସୁନ୍ଦର ଭକ୍ତି ଅର୍ଘ୍ୟ ଘେନ ମୋର 

ଅଜ୍ଞାନ ଅଧମ ଜାଣେ ନାହିଁ ପୂଜା  ଜପୁଅଛି ପଞ୍ଚାକ୍ଷର

ଢାଳିଦିଅ ପ୍ରଭୁ କରୁଣାର ବାରି ହସିଉଠୁ ଏ ସଂସାର। ।

ନାହିଁ ପାଶେ ପ୍ରଭୁ ତୁମ୍ଭ ପୂଜା ପାଇଁ ଚମ୍ପା ବେଲପତ୍ର କ୍ଷୀର

ଅନ୍ତର ଭକତି ସମର୍ପି ଡାକୁଛି ରାତି ରହି ଉଜାଗର 

ଜାଳିଅଛି ପ୍ରଭୁ ଚରଣେ ତୁମ୍ଭର ହୃଦୟ ଦୀପାଳି ମୋର

ହରିନିଅ ଦେବ ସକଳ ସଙ୍କଟ ହସିଉଠୁ ଏ ସଂସାର ।

ଶ୍ମଶାନ ନିବାସୀ ହେ ଡମ୍ବରୁଧର କୃପାମୟ ବାବା ହର

କୋପେ ବର ତପେ ବର ଯାଚିଦିଅ ପାପୀକୁ ବିନାଶ କର

ସଂସାର ହିତରେ ବିଷ ପାନ କରି ନାମ ନୀଳକଣ୍ଠେଶ୍ୱର

ତଵ ଜ୍ୟୋତିରାଶି ବିସ୍ତାରିତ କର ହସିଉଠୁ ଏ ସଂସାର ।

ଆଶୁତୋଷ ରୁଦ୍ର କରୁଣାବତାର ମହାଦେବ ଗଙ୍ଗାଧର

ପ୍ରତି ପ୍ରାଣେ ଶାନ୍ତିପ୍ରୀତି ଭରିଦିଅ ହସିଉଠୁ ଏ ସଂସାର ।